Metinaro, 24 Abril 2026 (Media Democracia)- Membru F-FDTL na’in 57 termina kursu Lideransa Treinamentu lideransa ofisiál Dezenvolvimentu no treinamentu apoiu ba Paz ne’ebé hetan apoiu husi Forcas-Australianu sira liu-husi DCP-TL.
“Kursu sira ne’e kondus husi CTOAP/CICNL durante fulan rua (2) nian laran desde loron 23 fulan Fevereiru to’o ohin loron 23 de Abril de 2026 ho total partisipante/ formandos 57 pessoas ne’ebe mai husi Komponente no Unidade sira, atividade formasaun sira ne’e hetan apoiu makás em termos material, ekipamentu inklui instrutor sira husi ita nian parceiru Forcas-Australiano sira liu-husi DCP-TL.” Dehan Xefe Estadu Maior Jenerál Domingos Raul “Falur Rate Laek” ne’ebé reprezenta husi Komandante Forsa Apoiu Jerál, Tanente Coronel João Bosco Ximenes “Lenok” liuhusi nia diskrsu iha sentu CICLN Metinaro kinta ne’e (23/04)
Tanente Koronél ne’e dehan, sertifikadu ne’e serve nu’udar prova reak ba esforsu hirak ne’ebé halo liuhusi kapasidade no kooperasaun di’ak no responsabilidade durante fulan rua nian laran.
“Ohin hatudu rezultadu ne’ebé di’ak no susesu, Komandu orgullu teb-tebes ho ita-boot sira nia esforsu, ita-bo’ot sira la’ós de’it matenek, korajen no dixiplina, maibé mós komprometidu hodi kontinua aprende ba kreximentu profisionál iha materia kona ba lideransa no operasaun apoiu ba paz nian.” Dehan Tanente Coronel
Nia afirma katak, fatór fundamental ne’ebé sempre fó susesu ba atividade kursu no formasaun sira mai husi jestaun ne’ebé di’ak husi Centro de Instrução Comandante Nicolau Lobato (CICNL) nian.
“Ida ne’e, ita hotu tenki rekuñese, aleinde ida ne’e, nu’udar komandante Forças de Apoio Geral nian hakarak hato’o agradesimentu wain ba apoiu oi-oin husi parte Forca de Defesa Australia nian liu husi DCP-TL ba atividade formasaun sira ne’e no husu atu liu husi DCP-TL kontinua mantein apoiu ba iha atividade formasaun sira ne’e iha futuru.” Nia afirma
Komamdante Forsa Apoiu Jerál ne’e afirma katak materia ba kursu Lideransa Ofisiál nian, orienta liu ba oinsa atu prepara oficial sira hodi komanda força ba operasaun manutensaun apoiu ba paz, importante liu maka materia barak ligadu ho Kompeténsia nu’udar komandante kompañia.
“Ba maluk sargentu no praças sira, nudar komandante hau konfirma katak, iha materia TREINAMENTU PELOTAUN APOIU BA PAZ nian, ita-bo’ot sira aprende klean teb-tebes kona ba treinu tatika individual kombate nian, treinu koletivu ba kombate nian, treinu ba misaun operasaun ba apoiu paz nian inklui materia espesifiku sira seluk. Nune’e hakarak hato’o boa-aproveitamentu no boa-sorte ba ita-bo’ot sira hotu.” Nia tenik
Tanba ne’e Komandante FAG enkoraja formandu sira atu tau matéria ne’ebé durante simu iha formasaun ne’e ba prátika.
“Ita-bo’ot sira nian abilidade no kunesimentu liu husi atividade diaria nune’e materia espesifiku oi-oin ne’ebe ita-boot sira aprende labele lakon le’et deit no labele hela deit ho ita-bo’ot sira, maibe tenki fahe hodi hadaet ba maluk militar sira seluk, kunesimentu iha materia Lideransa Ofisiál Dezenvolvimentu no Treinamentu Apoiu Paz nian nudar bukae essencial ida ba ita-boot sira.” Nia adianta
Nia parte, lori Xefe Estadu Maior Jenerál Domingos Raul “Falur Rate Laek” hato’o agradese ba ba formadór sira husi forsa Australiano nian ne’ebé sempre fó tulun makás ba programa no atividade formasaun sira ne’ebé realiza iha CICNL ne’ebé hatudu rezultadu di’ak.
Reportájen: Estefánia Cardoso
Foto: Estefánia Cardoso