Dili, 04 Maiu 2026 (Media Democracia)- Komunidade Jornalista sira iha Timor-Leste selebra loron mundiál liberdade atu luta hodi promove liberdade imprensa no espresaun iha Timor-Leste.
Tuir Presidenti interina KonselIu imprensa Suzana Cardoso hato’o parabéns ba jornalista hotu iha Timor-Leste tanba jornalista mós hola parte importante iha progresu desenvolvimentu jornalista hanesan fatuk-inan demokrasia liuhusi média ne’ebé hakna’ar an ba.
“Parabens ba ita boot sira ho ita nia idade ne’ebé aumenta ba dadaun no independensia ne’ebé tinan aumenta ba bebeik espera hala’o ita-nia kna’ar ho profesional liután no respeita ba Lei komunikasaun sosial bazeia ba kódigu étika jornalista atu nu’une ita hakna’ar an iha vida profiasaun jornalizmu nian bele la’o ho valór no dedikasaun aas previlejiu iha komunidade lian laek sira-nia leet.” Nia dehan liubusi intervensaun iha selebrasaun loron liberdade imprensa iha Palásiu Governu nia oin
Aleinde Agradese ba ita hotu ne’ebé partisipa iha atividade refere no nia mós husu atu halo orasaun ba malu atu nafatin iha saúde ne’ebé di’ak, tanba dalabarak jornalista servisu liu oras no deskansa tarde, tan ne’e nafatin iha orasaun no kuidadu aan atu iha forsa hodi hanojn krítiku ba progresu dezenvolvimentu iha Rai Doben Timor-Leste
Iha fatin hanesan, Prezidente Asosiasaun Jornalista Timor-Leste, Zevónia Vieira informa, indeks relatóriu husi sem fronte hatudu Timor-Leste nia indeks sa’e ba 30 iha global no sei mantein renting iha sudueste asiátiku rengking 1.
“Ida nee hatudu progresu ida maibé ita kontinua servisu maka’as hodi kontinua promove, Servisu makaas signifika ita kontinua alerta ba públiku ba ema sira ne’ebé iha poder atu labele limita ita-nia liberdade imprensa iha Timor-Leste, tanba media hanesa pilar importante iha nasaun demokrátiku.” Dehan Zevónia Vieira ba jornalista sira iha Palásiu Governu nia oin segunda ne’e (04/05)
Situasaun ne’ebé jornalista sira hasoru iha terrenu la hanesan ho indeks ne’ebé hetan, tanba hahú iha sensor ship ka take down news liliu ba media estatal sira hodi fó perigu no tentativa ne’ebé perigu no fó risku, oinsa kobertura sira ne’ebé ko’alia lia-loos tenta atu hasubar no halakon nune’e públiku labele asesu.
“Espera katak ho ita nia soliedariedade ita jornalista servisu hamutuk atu kontinua influensia iha públiku no ba ema sira ne’ebé mak iha poder atu respeita pilar media iha Timor-Leste tanba media papel servisu iha tempu uluk no too agora nee iha kontribui boot, iha luta hasoru violasaun diretus umanus nomos luta ko’alia kona-ba públiku nia intrese Timor-Leste.” Prezidente AJTL preokupa
Iha biban ne’e Prezidente AJTL ne’e mós fó onra ba jornalista sira liliu ba Eis Prezidente Konsellu Imprensa Otéluo Ote nia falesida ne’ebé sai hanesan memória no refkesaun ba jornalista hotu oinsá atu kontinua lori obra jornalístiku tuir kódigu jornalizmu nian hodi hato’o lia loos ba públiku. Tanba bainhira demokrasia la saudável signifika lia-loos mós públiku la asesu.
Aleinde ne’e AJTL mós kontinua fó hanoin ba Sekretáriu Estadu Komunikasaun Sosiál atu haree mak artigu no lei refere la hamate Liberdade Imprensa no Espresaun tanba iha Konstituisaun RDTL arigu 41 mós garante.
“Nune’e lei komunikasaun ne’ebé mak atu altera ne’e tuir duni ezizensia AJTL TLPU no UPTL, jornalista tomak nomós média na’in sira labele hamate ita-nia liberdade imprensa tanba ne’e sai hanesan ona ita nia ukun fuan ne’ebé importante atu kontinua promove mantein asegura garante ita-nia liberdade imprensa.” Nia afirma
Zevónia iha esperansa katak, lei komunikasaun sosial ne’ebé altera la iha artigu foun sira atu uza kriminiza servisu jornalista nian iha terrenu liu-liu ba media online sira, plata forma sira atu bele impede reportajem ne’ebé investigativu kona-ba Boagovernasaun, asuntu diretus umanus ne’ebé akontese iha Timor-Leste.
“Laiha artigu balu neebe maka Governu tau iha laran atu bele uza sira nia poder atu hamate liberdade imprensa ida ne’e AJTL sei kontra makaas, Espera katak, mantein nafatin asegura ita nia liberdade ne’ebá.” Nia adianta
Nia mós preokupa tanba média officer ne’ebé servisu iha Instituisaun Públiku mós iha diretu hetan karteira profisional husi konsellu imprensa ne’e lalos.
“Tanba sira hala’o ona servisu ba instituisaun Governu no sira iha polítika rasik la halo atividade jornalizmu loro-loron hodi fó sai asuntu públiku nian entaun sira uza kartaun profisional ba no interese grupu ka instituisaun ida ne’e laloos no ida ne’e AJTL no asosiasaun sira seluk mós la aseita.” Nia dehan
Tanba artigu ne’ebé asosiasaun sira no jornalista sira preokupa ne’e dadaun ne’e hela Sekretariu Estadu Komunikasaun Sosiál, banhira atu aprova, Parlamentu Nasionál tenke tetu didi’ak no nafatin respeita pilar media iha Timor-Leste tanba ita sai prémiu iha sudeste asiátiku.
Reportájen: Estefánia Excar, Júlia Trindade, Leozália Oliveira
Foto: Media Democracia