Dili 23 maio 2026 (Media Democracia)– Uniaun Estudante Universitariu Munisipiu Viqueque (UEUMV) realiza komunikadu imprensa hodi ezije IX Governu Konstitusionál, Parlamentu Nasionál, Ministériu Obras Públiku no Autoridade Munisipiu Viqueque atu urjentemente hadi’a kondisaun estrada sira ne’ebé grave tebes iha Munisipiu Refere
Tuir Porta-voz UEUMV Antonio Gomes, hateten durante ukun aan maibé povu Viqueque seida’uk sente mudansa signifikadu no seida’uk sai husi linha pobreza.
“Ami ezije ida ne’e tanba Problema prinsipál infraestrutura estrada, ponte, bee-moos, eletrisidade, internet, edukasaun, saúde, agrikultura, turizmu no atendementu públiku ne’ebé la garanti, Postu Viqueque Villa hanesan kapital Munisipiu, kondisaun grave tebes, difikulta movimentasaun transporte públiku no privadu, Viqueque Villa Ossu, estrada grave tebes, difikulta transporte ba Baucau no Dili estrada rural iha Ossu mós grave tebes, Viqueque Villa, Lakluta estrada grave no ponte Welolo no Dilor iha Suco Uma-tolu kotu, difikulta movimentasaun komunidade, estrada rural iha Lakluta mós kontinua grave, Viqueque Villa Uatulari no Uatucarbau kuaze dekada 2 resin, kondisaun kontinua grave tebes, mota Beaço ho Ailembata seida’uk iha ponte, difikulta transporte atu ultrapassa” Dehan Porta-voz Antonio Gomes iha Jardin 5 de MAIO, (22/05/2026).
Iha fatin hanesan Apolinario da Silva afirma UEUMV mós nota katak estrada rural iha Postu Administrativu Uatulari ba suku no aldeia sira hanesan Loi-ulu, Afaloikai, Bubulale, Kaiwai-lita, no Bahatata kontinua sai preokupasaun, iha tempu udan, transporte públiku labele asesu no komunidade difisil atu halo viajen ba Postu no ba Munisipiu
“Husu Prezidente Autoridade Munisipiu Viqueque (PAM) Tenke iha responsabilidade politika hodi solusiona problema estrada no aprezenta planu konkretu ba MOP no Konsellu Ministru, Ministériu Obras Públiku (MOP), tenke tau atensaun ba konstrusaun estrada sira iha Munisipiu Viqueque, ba Parlamentu Nasionál hala’o nia funsaun fiskalizasaun no diskute problema povu nian (UEUMV) preokupa tanba Parlamentu dalaruma sai fatin konfrontasaun interese partidu duke diskute interese povu, ba IX Governu Konstitusionál, orienta MOP no PAM hodi solusiona problema estrada labele hein to’o tempu kampaña mak tun ba area rural hodi fó promesa falsa, maibé depois ukun la tau importánsia” . Dehan UEUMV Apolinario da Silva
Nia esplika iha Munispiu Viqueque iha populasaun 102.637 no riku ho rekursu naturál hanesan turizmu, Ossu Larigutu, Lihunu, Bee Manas Kraras, Bee Manas Lacluta, Irabere no Ailembata
“tanba estrada aat, povu difisil atu asesu merkadu, ospitál, eskola no transporte públiku, problema hirak ne’e fó prejuizu boot ba populasaun sira atu halo movimentu ba mai, lori produtu ba merkadu, asesu ba ospitál no eskola, tanba husi, UEUMV ne’ebé nu’udar movimentu extra-parlamentar ne’ebé iha kompromisiu ba Almamater no valores kampus, hodi sai ajente transformasaun sosial ba povu Viqueque, tanba u’udar Timor oan ezize nafatin se enquantu sira la halo, di’ak liu ami Viqueque lalika vota tiha de’it, vota mos hanesan de’it se inan aman iha Viqueque rona ami nia lian, se ami hakarak vota mak tinan lima ami sei lakon tan oportunidade ba dezenvolvimentu Rai Viqueque nian, karik laiha solusaun ami sei dialogu karik tuir ami akademiku entaun ita dialogu ho parte relevante sira ne’ebé mak asumi”. Nia dehan
Nia subliña karik laiha solusaun sei dialogu ho autoridade PAM, karik laiha UEUMV sei kontinua mai iha MOP ne’e rasik karik seluk husi ida ne’e mak sei kulia tan, Ida ne’e la’os ba ami Viqueque oan de’it inklui mos ba 13 Munisipiu hotu tenke tau atensaun ba estrada sira, tanba ne’e mak ami ezije ba parte relevante ne’ebé mak ami sita, labele to’o de’it iha promesa maibé tenke iha asaun konretu, tanba povu nia konfiansa ba imi tenke simu responsabilidade moral atu tula ba imi nia kabas ne’e nu’udar konfiansa públiku konfiansa maromak nia lian.
UEUMV informa povu nia konfiansa labele konsidera hanesan buat laek, maibé konsidera hanesan responsavel moral atu ezekuta programa sira ne’e ho di’ak, atu implementasaun públika ne’e bele garante sustentabilidade
Reportajen:Juliana/Leozalia
Foto: Leozalia