Díli, 17 de Junhu 2026 (Media Democracia)- Asosiasaun Akadémika Estudantil Fakuldade Edukasaun Arte no Humanidade (AAE-FEAH) hamutuk ho Asosiasaun Akadémika Estudantil Departamentu Tetun, lamenta no ezije ba Reitór Universidade Nasional Timor Lorosa’e (UNTL), Joviano António da Costa, atu hatun despaixu ba Konsellu Disiplinár hodi prosesa tuir lei ba dosente ho naran inisiál A.A.T iha Departamentu Língua Tetun ne’ebé deskonfia halo kobransa ilegál no prátika falsifikasaun notas.
Portavoz Asosiasaun Akademika Estudantíl Fakuldade Edukasaun Arte no Humanidade, Auxiliadora de Santa Rosa hateten, kazu ne’ebé Manorin ho Inisial A.A.T halo dala barak ona no bosok bebeik maklotak sira atu entrega osan hahú husi 2017 to’o ohin loron kontinua bosok maklotak sira hodi uza ba interese privadu.
“Relasiona ho kazu ne’ebé manorin ho inisiál A.A.T halo kobransa ba maklotak sira ho ilegál, ne’ebé halo maklotak sira sai vítima ba hahalok aat ne’e iha Departamentu Tetun, mak Asosiasaun Akadémika Estudantil Fakuldade Edukasaun no AED Tetun hamutuk ho maklotak ativu sira hakarak hola pozisaun hodi kontra injustisa hirak-ne’e, tanba asaun prostituta ne’e afeta direta ba maklotak sira.” Dehan Portavoz Asosiasaun Akademika Estudantil Fakuldade Edukasaun no Humanidade liuhusi konferénsia imprensa Iha Kampus Liceu Kuarta ne’e (17/06).
Asosiasaun Akademika Estudantíl Fakuldade Edukasaun Arte no Humanidade mós kestiona tanba manorin sira la aplika sistema atu hatuur buat hotu-hotu ho loloos, ba kazu ne’e rasik manorin halo dala-barak hodi bosok bibeik ona maklotak sira atu entregra osan ba nia hahú husi 2017 to’o ohin loron kontinua bosok maklotak sira ne’ebé manorin A.A.T halo ba nia interese privadu.
Auxiliadora de Santa Rosa dehan, hahalok ne’e se’i estraga futuru reputasaun UNTL nian no posibilidade universidade ne’ebé sai fatin aprendisajen sei nakfilak fali ba fatin manorin sira hodi prátika korupsaun, liliu sei buras iha Timor-Leste karik parte relevante sira la toma medida hodi kombate hahalok sira ne’e.
AAE FEAH husu ba estrututa Fakuldade no Universidade tenke kontrolu másimu ba Departamentu hotu atu labele akontese tan aktu sira, hanesan halo kontribuisaun ilegal iha Universidade no sira seluk tan iha futuru, sira-nia parte husu mós ba Reitór Joviano atu hatun despaixu ba konsellu dixplinár hodi loke diskusaun, hodi bele prosesa tuir norma no lei sira ne’ebé estabelese iha UNTL.
Iha Sorin seluk, Eugenio Soares Tilman afirma katak, karik Fakuldade no Universidade la foti medida hodi rezolve problema ne’e maka, Asosiasaun Akademika Estudantil sira se’i junta forsa hamutuk hodi blokeia total administrasaun iha Fakuldade Eduksaun Arte no Humanidade.
“Ezijénsia ne’ebé deskreve ona mak Fakuldade no Universidade la lalais foti medida hodi rezolve ba problema hirak-ne’e iha loron tolu tuir mai mak, Associacão Akadémika Estudantil FEAH hamutuk ho AED departamentu sanulu sei junta forsa hamutuk hodi blokeia totál prosesu administrasaun iha fakuldade no possibilidade bele to’o iha Universidade.” Dehan Eugénio
Enkuantu iha Konferénsia imprensa ne’e, AEE FEAH no AED Departamentu Tetun fó ultimatu katak, bainhira Fakuldade no Universidade la foti medida iha loron tolu nia laran, sira sei blokeia administrasaun FEAH no bele estende ba UNTL tomak.
Reportajen: Novita Soares, Leozalia Oliveira
Foto: Novita Soares