Díli, 27 Juñu 2026 (Media Democracia) – Saudozu Francisco Guterres ‘Lú-Olo’ hala’o nia vizita ikus ba Komité Sentral FRETILIN (CCF), iha serimónia ne’ebé nakonu ho sentimentu triste nia laran. Durante omenajen ne’e, loke mós muzika rua ne’ebé lori mensajen kle’an, hodi konvida prezente sira halo reflesaun kona-ba moris, luta no legadu ne’ebé saudozu husik ba Partidu FRETILIN no povu Timor-Leste.
Sekretáriu Jerál Partidu FRETILIN, Mari Alkatiri, hateten katak omenajen ikus ba saudozu Francisco Guterres ‘Lú-Olo’ ho muzika rua ne’ebé interpreta durante serimónia, fó oportunidade ba ema hotu atu halo reflesaun kle’an kona-ba letra husi muzika sira ne’e, ne’ebé lori mensajen kona-ba moris, unidade no legadu ne’ebé saudozu husik ba povu Timor-Leste.
“Saida mak ohin ita rona husi muzika rua ne’e fo mai ita tempu atu halo refelesaun katak ‘Por Me para transforma, Por me para dezenvolver, tanba povu sei hein hela ita,” dehan Mari Alkatiri, liu husi nia diskursu ikus hafoin fo omenajen ba Saudozu Lu-Olo, iha CCF Komoro, sexta (26/06).
Nia hatutan, husi muzika ne’e hatudu katak Maubere nafatin primeiru ba ema hotu, ema ida-idak banati tuir Saudozu nia simplisidade, tanba muzika ne’e nia mensajen ho liafuan mai ida furak tebes.
Mari Alkatiri, akresenta, saudozu hanesan ema ida ne’ebe mai husi familia simples, no nia ema ida ne’ebe puru no hakribi korupsaun.
“Ita hotu hatene Lu-Olo lider ida ne’ebe mai husi familia simples oinsa atu hadomi ema hotu, tanba ne’e nia sai lider ida puru no hakribi korupsaun, nune’e bainhira ami na’in rua hasoru malu dahuluk iha aileu remesio bainhira ha’u to’o rai-liur. Ha’u dehan lider ida ne’e mai duni husi povu Timor-Leste. Entaun Interasaun entre ami na’in rua iha esperensia oi-oin maibe valor hanesan de’it, tanba ne’e interasaun kesi ami na’in rua metin to’o Maromak bolu nia,” Alkatiri hateten
Nia afirma tan fundamenta, ho kamarada Saudozu Lu-Olo nia simplisidade no onestidade ba povu, bainhira nia hakotu iss hodi husik mundu, aileba, ema ho difisiénsia no povu mai haree no presta omenajen.
“Ha’u nunka haree ida ne’e, maibé oinsa ema ida hanesan Prezidente Lu-Olo, bainhira nia iss kotu hodi husik mundu, nia forsa mai tomak. Ida ne’e hatudu povu hatene nia ema ida ne’ebe defende povu, nune’e duni aileba sira ba to’o iha ne’eba atu haree sira nia lider ba dala ikus, ne’e mak hau hare ho hau nia matan,” Katak nia
Aleinde ne’e, ba Sekretáriu Jerál Fretilin, sente todan, maibe nia prontu atu hasoru situasaun hotu, tanba Lu-Olo husik hela todan ba nia kabas.
“Ha‘u prontu atu hasoru situasaun ida ne’e, no ha’u tenke simu hodi kontinua nia misaun ba futuru hodi kore povu husi kiak, entaun ha’u husu ita atu respeita saida kamarda Lu-Olo husi hela ba ita atu ita hotu halo reflesaun ida kle’an atu hatene ba oin, ida ne’e mak importante liu,” nia tenik
Eis Primeiru Ministru ne’e, husu ema hotu atu labele fo sala ba malu, maibe hotu-hotu hamutuk hodi kore povu husi mukit.
Reportajen : Tomás dos Santos
Foto”: Tomás dos Santos