Díli, 30 Juñu 2026 (Media Democracia) – Governu Timor-Leste hato’o agradese ba povu tomak ne’ebé durante períodu lutu nasionál, hatudu respeitu, solidariedade no unidade, liuhusi partisipa másimu iha serimónia no prosesu fúnebre ba saudozu Eis-Prezidente Repúblika, Francisco Guterres “Lú-Olo”. Governu konsidera apoiu no prezensa povu nian hanesan manifestasaun ida husi rekoinesimentu ba kontribuisaun boot ne’ebé saudozu fó ba independénsia no dezenvolvimentu nasaun.
Tuir Vise Primeiru Ministru, Ministru Koordenador Asuntus Sosial no Ministro Dezenvovilmentu Rural no Habitasaun., Mariano Asanami Sabani afirma Governu Timor-Leste hato’o agradese ba povu tomak ne’ebé durante períodu lutu nasionál ba saudozu Eis-Prezidente Repúblika, Francisco Guterres “Lú-Olo”.
“Ha’u hakarak hato’o ha’u-nia agradesimentu boot liu ba povu Timoroan tomak no ba instituisaun públiku no privadu hotu-hotu tanba sira hatudu respeitu aas, unidade no responsabilidade durante loron hitu Lutu Nasionál ne’ebé Governu dekreta tanba matebian husi ita-nia Eis-Prezidente Repúblika, Sua Excelénsia Francisco Guterres “Lu Olo”. Dehan Vise Primeiru Ministru, Mariano Asanami iha Palasiu Governu, (29/06/26)
Nia afirma Partisipasaun boot husi povu iha serimónia funebre no omenajen oioin iha rai-laran hatudu dala ida tan katak ita-nia povu fó rekoñesimentu kle’an ba legadu husi ema ida ne’ebé dedika nia moris tomak ba luta independénsia no servisu ba Timor-Leste.
“Ha’u hakarak agradese ho maneira espesial ba Forsa Defeza no Seguransa, autoridade relijioza sira, profisionál saúde sira, funsionáriu públiku sira, órgaun komunikasaun sosiál sira, organizasaun sosiedade sivíl sira no instituisaun privadu sira ne’ebé ho dedikasaun, profisionalizmu no espírito misaun kontribui ba serimónia hotu-hotu lao ho dignidade, ordem no respeitu”. Nia hatutan
Ba sidadaun hotu-hotu ne’ebé presta sira-nia omenajen, respeita períodu Lutu Nasionál no hamutuk iha tempu susar ida-ne’e, ha’u hato’o ha’u-nia rekoñesimentu no respeito tomak. Hanesan nasaun ida, ita hatudu katak ita hatene oinsá atu fó onra ba ita nia ema sira ne’eb fo sira nia vida tomak ba nasaun.
Ita-nia saudozu Francisco Guterres “Lu Olo” nia hanoin nafatin inspira ita atu servisu ba dame, unidade nasionál no dezenvolvimentu Timor-Leste.
Lori Governu nia naran, dala ida tan ha’u renova ha’u-nia kondolénsia kle’an liu ba família enlutada no agradese ba povu timoroan hotu-hotu tanba solidariedade no ezemplu sivizmu ne’ebé fó ba ita-nia rain.
Reportajen :Tomás dos Santos
Foto : Tomás dos Santos