Díli, 30 Juñu 2026 (Media Democracia)- Autoridade Protesaun Civil (APC), selebra aniversáriu ba dala 4 ho tema “Futuru Resiliente liuhosi Inovasaun no Adaptasaun ba Mudansa Klimátika.
Prezidente Autoridade Protesaun civil (APC) Jesuino dos Reis Matos Carvalho, hateten durante tinan haat nia laran, instituisaun ne’e kontinua fó atendimentu emerjénsia, apoiu ba komunidade afetadu husi dezastre no hala’o programa rekuperasaun iha rai-laran tomak
“Ohin selebra aniversáriu ba dala-4 desde instituisaun ida-ne’e estabelese iha okos Ministériu Interior, maski nune’e, servisu protesaun sivil no resposta emerjénsia seida’uk foun, tanba antes ne’e hala’o ona husi Ministériu Solidariedade Sosial antes reorganizasaun ba estrutura governu, estrutura APC mos servisu hamutuk ho bombeiru sira atu hasa’e kapasidade resposta ba dezastre.” Hateten Prezidente APC Jesuino dos Reis iha Salaun CNE Larigutu (29/06/2026)
Aleinde ne’e, infraestrutura bázika hanesan estrada ne’ebé ladún di’ak mos sai dezafiu boot ba ekipa APC atu asesu lalais ba komunidade sira ne’ebé presiza asisténsia
“Durante ne’e APC mos fó atensaun ba komunidade sira, liuliu iha área rurál, atu la sente mesak bainhira hasoru dezastre, nune’e, Ami Nia parte esforsu atu to’o ba fatin afetadu, maski hasoru limitasaun barak, hanesan falta rekursu umanu, ekipamentu no transporte ne’ebé sufisiente, atu prevene risku dezastre, APC Kontinua fó resposta emerjénsia, maibé mos hala’o programa sensibilizasaun ba komunidade sira kona-ba preparasaun no maneira atu hases-an husi dezastre.” Nia afirma
Iha aniversáriu ne’e, Prezidente APC apresia dedikasaun no servisu funsionáriu sira ne’ebé servisu ho laran tomak maski hasoru limitasaun oioin
“Ami sei kontinua moderniza nia mekanizmu servisu no buka apoiu atu hasa’e kapasidade atu fó atendimentu ne’ebé di’ak liután ba komunidade sira, tanba durante ne’e servisu la hala’o mesak, maibé hamutuk ho Polícia Nacional de Timor-Leste no Falintil-Forças de Defesa de Timor-Leste, liuliu iha operasaun resposta ba dezastre iha área rural.” Nia hatutan
Iha Fatin hanesan Sekretariu Estadu Protesaun Civil APC) Domingos Mariano Reis hateten servisu protesaun sivil presiza apoiu husi rekursu importante sira hanesan rekursu umanu, rekursu finanseiru, fasilidade no infraestrutura atu asegura resposta emerjénsia ne’ebé efetivu
“Esperiénsia durante tinan hirak liubá sai referénsia importante atu hadi’a preparasaun no dezenvolve kapasidade atu responde lalais ba emerjénsia no dezastre iha Timor-Leste, nune’e Autoridade Protesaun Civil PC nia misaun atu servi no proteje sidadaun sira husi risku dezastre. Instituisaun ne’e mós garante katak ekipa resposta emerjénsia prontu durante oras 24 atu fó asisténsia bainhira akontese dezastre, Parte Autoridade Protesaun Civil afirma katak limitasaun rekursu la bele sai obstákulu ba misaun atu proteje komunidade”. Dehan Sekretariu Estadu Protesaun Civil Domingos Mariano
Nia afirma tan durante tinan ne’e, Autoridade Protesaun Civil rejista vítima hamutuk 1.421 ema tanba dezastre naturál, inklui inundasaun, rai halai, anin boot no ahi han uma
“APC asegura katak vítima hotu-hotu simu apoiu emerjénsia no asisténsia ba prosesu rekuperasaun, iha selebrasaun aniversáriu ba tinan 4 ne’e, Ami husi parte Autoridade Protesaun Civil, kompromete atu kontinua hametin preparasaun, responde lalais ba emerjénsia, no hametin reziliénsia komunidade sira hasoru impaktu mudansa klimátika no dezastre naturál iha Timor-Leste”. Nia hatutan
APC espera katak iha futuru bele hetan rekursu no apoiu ne’ebé di’ak liután atu hametin kapasidade no kontinua fó atendimentu lalais no efetivu ba komunidade sira, liuliu vítima dezastre iha Timor-Leste
Reportajen : Novita/Julia
Foto : Novita