Dili, 02 Jullu (Media Democracia)– Tribunál Judisiál Primeira Instánsia Dili (TJPID), liuhusi Juíza Turnu, Ercília de Jesus, hasai despaixu hodi aplika medida kausaun Prizaun Preventiva ba arguidu ho inisiál “D”, tanba konsidera iha indísiu forte katak arguidu envolve iha krime haat ne’ebé Ministériu Públiku promove hasoru nia.
Krime haat ne’ebé Ministériu Públiku promove hasoru arguidu mak hanesan krime Asosiasaun Kriminoza, tuir artigu 188 husi Kódigu Penál; krime Esplorasaun Ilísita ba Jogu, tuir artigu 322 husi Kódigu Penál; krime Brankamentu Kapitál, tuir artigu 313 husi Kódigu Penál; no krime Fraude Fiskál, tuir artigu 314 husi Kódigu Penál.
Arguidu ho inisiál “D” suspeita nu’udar manajér ba atividade scam call center ne’ebé opera iha área Tibar, Postu Administrativu Bazartete, Munisípiu Likisá. Fatin refere ne’e mak Polísia Nasionál Timor-Leste halo operasaun buska no apreensaun iha loron Sesta (26/6) dader, tanba deskonfia katak iha atividade scam online call center ne’ebé la tuir lei.
Iha despaixu ne’e, Tribunál mos aplika medida koasaun Aprezentasaun Periódika ba arguidu nain 60 seluk, ho obrigasaun atu aprezenta an semana ida dala ida, iha loron Sesta, iha eskuadra Polísia ne’ebé besik sira-nia hela fatin.
Iha despaixu refere, Tribunál mós deside atu aplika medida koasaun selu kausaun osan ba arguidu na’in-60. Tuir desizaun ne’e, kada arguidu iha obrigasaun atu selu kausaun osan hamutuk dolar amerikanu rihun rua atus lima-nulu (US$2.500) iha laran, loron sanulu (10), hahú sura husi loron ne’ebé Tribunál hasai despaixu.
Tribunál mós aviza katak, bainhira arguidu na’in-60 la kumpre obrigasaun atu selu kausaun osan tuir prazu ne’ebé determina ona, sira bele hasoru konsekuénsia jurídika no penál tuir dispozisaun lei nian.
Reprtajen : Estefania Cardoso
Foto : Estefania Cardoso