Díli, 02 Jullu 2026 (Media Democracia) – Estudante sira husi Fakuldade Siénsias Sosiál no Polítika (FCSP), Departamento Komunikasaun Sosiál (DCS), Universidade Nasional Timor Lorosa’e (UNTL), ne’ebé hala’o estajiu durante fulan tolu iha Media Democracia, hahu husi loron 1 Abril to’o 1 fulan Jullu tinan 2026, ohin loron 2 fulan Jullu 2026 oficialmente remata sira-nia programa estajiu, no Dosente orientadór, retira estudante sira hafoin konklui programa aprendizajen ne’e.
Tuir Diretora Media Democracia, Teresa V.F. Guterres, hato’o agradese ba Universidade Nasional Timor Lorosa’e (UNTL), liu husi Fakuldade Siénsias Sosiál no Polítika (FSSP), Departamento Komunikasaun Sosiál (DCS), tanba fó konfiansa ba Media Democracia hodi simu estudante estajiáriu sira halo estájiu profisionál.
“Diretora afirma programa estájiu ne’e importante tebes atu fó oportunidade ba estudante sira aprende direta iha ambiente servisu jornalístiku, nune’e bele kompleta sira-nia abilidade prátika no hasa’e koñesimentu kona-ba área komunikasaun no jornalizmu”. Dehan Diretora Teresa Guterres, Iha Timor Logde Comoro (02/07/26).
Nia mos reafirma durante períodu estájiu, estudante sira sei envolve iha prosesu produsaun notísia, kobertura eventu, halo entrevista, hakerek notísia, no aprende ética profisaun jornalista nian, ho orientasaun husi ekipa Media Democracia.
“Kooperasaun entre Media Democracia no UNTL bele kontinua iha futuru atu kontribui ba dezenvolvimentu rekursu umanu iha setor média, no prepara estudante sira sai profisionál sira ne’ebé iha kompeténsia no responsabilidade aas”. Nia hatutan
Nia hatutan Media Democracia kompromisu atu nafatin fó fatin aprendizajen ba estudante sira atu dezenvolve sira-nia kapasidade no prepara an ba mundu servisu iha área komunikasaun no jornalizmu.
Parte seluk tuir Professor orientadór estajiu husi Universidade Nasional Timor Lorosa’e (UNTL), Francisco Mariano dos Santos, hato’o nia agradesimentu ba Media Democracia ne’ebé simu estudante sira husi Departamento Komunikasaun Sosiál (DCS), Fakuldade Siénsias Sosiál no Polítika (FSSP), atu hala’o programa estajiu durante fulan tolu.
“Agradesimentu ba Media Democracia ne’ebé simu estudante sira husi Departamento Komunikasaun Sosiál (DCS), Fakuldade Siénsias Sosiál no Polítika (FSSP), atu hala’o programa estajiu durante fulan tolu. Programa estajiu ne’e hahú iha loron 1 Abril to’o 1 Jullu 2026. Iha loron 2 Jullu 2026, universidade oficialmente hala’o prosesu retira fali estudante estajiáriu sira hafoin remata sira-nia períodu estajiu”. Dehan Professor Francisco Mariano
Nia esplika katak durante fulan tolu ne’e, estudante sira hetan esperiénsia direta iha área jornalizmu, aprende oinsá halo kobertura notísia, entrevista, hakerek no edita notísia, no komprende liután kona-ba ética no responsabilidade jornalista nian.
“Oportunidade ne’ebé Media Democracia fó ba estudante sira importante tebes tanba bele hasa’e sira-nia koñesimentu no abilidade prátika, ne’ebé sei sai kapital importante ba sira atu prepara an ba mundu servisu iha futuru. Esperiénsia ne’ebé estudante sira hetan durante estajiu sei ajuda sira atu sai profisionál sira ne’ebé prontu servisu iha instituisaun mídia ka fatin servisu seluk ne’ebé presiza kompeténsia iha área komunikasaun no jornalizmu”. Nia afirma
Professor Francisco Mariano dos Santos hato’o tan nia obrigadu wa’in ba Media Democracia ba kooperasaun no apoiu ne’ebé fó durante programa estajiu, no hein katak relasaun di’ak entre UNTL no Media Democracia bele kontinua iha tempu oin.
Hafoin remata programa estajiu durante fulan tolu, Media Democracia entrega sertifikadu ba estajiáriu na’in haat, maioria feto, husi Fakuldade Siénsias Sosiál no Polítika (FSSP), Departamento Komunikasaun Sosiál (DCS), Universidade Nasional Timor Lorosa’e (UNTL).
Entrega sertifikadu ne’e sai simbolu ida husi kooperasaun di’ak entre Media Democracia no UNTL, liu husi Departamento Komunikasaun Sosiál, no espera katak parseria ne’e bele kontinua iha futuru atu fó oportunidade ba estudante sira seluk atu aprende no dezenvolve sira-nia kapasidade profisionál.
Serimónia entrega sertifikadu remata ho foto hamutuk entre Diretora, Dosente orientadór no estajiáriu sira, hanesan sinal husi relasaun servisu no kooperasaun ne’ebé forte entre instituisaun rua ne’e.
Reportajen : Ekipa MD
Foto: Ekipa MD