Díli, 01 Agostu 2026 (Media Democracia) – Governu Timor-Leste prepara ona prosesu atu simu no lori fila hikas restu mortais bispu tolu no sasán sagradu sira ne’ebé relasiona ho Bispu Dom Alberto Ricardo da Silva, Dom Joaquim Ribeiro, Dom Jaime Garcia Goulart no Monsenhor Martinho da Costa Lopes husi Portugál mai Timor-Leste. Preparasaun ne’e hala’o liuhusi koordenasaun ho ministériu relevante sira no Igreja Katólika atu garante katak prosesu transladasaun ne’e lao ho dignidade no respeitu ba valor istóriku no relijiozu ba povu timoroan.
Ministru Administrasaun Estatal (MAE), Tomas do Rosário Cabral, hatete katak Governu kontinua halo koordenasaun ho Ministériu Interior, Ministériu Defeza no Ministériu Transporte no Telekomunikasaun, hamutuk ho Igreja Katólika, atu prepara prosesu transladasaun restu mortais bispu sira no sasán sagradu husi Portugál mai Timor-Leste.
“Enkontru ohin ne’e atu halo koordenasaun entre Ministériu Interior, Ministériu Defeza no Ministériu Transporte no Telekomunikasaun, atu prepara prosesu iha Dili. Governu fó apoiu ba Igreja Katólika Timor-Leste atu lori fila hikas restu mortais no sasán sagradu sira ne’ebé iha Portugál. Igreja mak lidera prosesu ne’e, no Governu prontu atu fó apoiu tomak,” dehan Tomas do Rosário Cabral ba jornalista sira iha sexta-feira (31/07/2026).
Ministru ne’e mos subliña katak iha loron 18 Agostu sei hala’o Missa Agradesimentu iha Igreja Espírito Santo, Évora, ne’ebé sei prezide husi Bispu Baucau ho reprezentasaun husi Primeiru-Ministru no komunidade timoroan sira ne’ebé hela iha Portugál.
Tuir nia, iha loron 19 Agostu sei hala’o misa solene iha Katedral Évora, prezide husi Patriarka Lisboa, ho partisipasaun husi bispu sira no Governu Portugál. Iha serimónia ne’e, Governu Portugál sei entrega oficialmente restu mortais bispu rua ba Timor-Leste.
Hafoin serimónia remata, ekipa husi Timor-Leste sei simu dokumentu ofisiál sira no servisu hamutuk ho autoridade Portugál atu prepara transportasaun. Kaixaun haat ne’ebé kontein restu mortais no sasán sagradu sira sei transporta husi Lisboa liu hosi Bali, no tuir planu sei to’o iha Aeroportu Internasionál Prezidente Nicolau Lobato, Díli, iha loron 1 Setembru 2026. Hafoin ne’e, sei lori ba Tasitolu no halo vizita ba fatin importante sira tuir programa ne’ebé prepara ona.
Reportajen: Joanita / Fizania (Estajiária)
Foto: Fizania