Ermera, 10 Setembru 2026 (Média Democracia) – Ministra Edukasaun (ME) halo vizita surpreza ba Eskola Ensinu Báziku Filiál (EEBF) Fahiteen, ho objetivu atu observa diretamente implementasaun Programa Merenda Eskolár no prosesu aprendizajen estudante sira iha eskola ne’e.
Komunikadu ne’ebé Média Democracia asesu iha pájina ofisiál Ministériu Edukasaun, Kinta-feira (10/09), hatete katak, durante vizita ne’e, Ministra Edukasaun observa preparasaun merenda eskolár no asegura katak ai-han prepara ho di’ak no tuir menu ne’ebé determina.
Aleinde ne’e, Ministra mós observa diretamente prosesu aprendizajen no interasaun entre profesór no estudante sira iha sala aula.
Ministériu Edukasaun rekoñese katak iha posibilidade katak iha eskola balu seidauk implementa Programa Merenda Eskolár tuir regra no padraun ne’ebé determina.
Tanba ne’e, Ministériu Edukasaun sei kontinua halo supervizaun no monitorizasaun hamutuk ho Ministériu Administrasaun Estatál, atu asegura katak estudante sira hetan ai-han nutritivu no saudável kada loron.
Ministériu Edukasaun mós hato’o apresiasaun no agradese ba komunidade, inan-aman no ema hotu ne’ebé kontinua fó apoiu no atensaun ba implementasaun Programa Merenda Eskolár.
Ministériu Edukasaun enkoraja komunidade atu relata bainhira iha problema ka implementasaun ida ne’ebé la tuir regra iha eskola, tanba kooperasaun husi parte hotu importante tebes atu hadi’a kualidade edukasaun no bem-estar estudante sira.
Rekorda katak, Programa Merenda Eskolár mak polítika Governu Timor-Leste nian ne’ebé fó refeisaun diária, saudável no nutritiva ba estudante sira iha eskola.
Programa ne’e iha objetivu prinsipál tolu, mak hasa’e nutrisaun hodi asegura katak labarik sira hetan ai-han ekilibradu ne’ebé ajuda sira-nia kreximentu no dezenvolvimentu; hadi’a prosesu aprendizajen liuhusi aumenta konsentrasaun, partisipasaun no frekuénsia estudante sira iha eskola; no promove produtu lokál liuhusi apoiu ba ekonomia lokál, ho sosa ai-han husi agrikultór no produtór lokál sira.
Reportajen: Octaviana da Costa
Foto: Pájina ME