Díli, 22 Outubru 2026 (Média Democracia) – Enkontru entre membru Konsellu Superior Majistratura, ne’ebé hala’o iha Palásiu Prezidensiál, Bairu-Pite, Díli, enkontru remata hafoin besik oras rua ho balun, maibé autoridade sira ne’ebé partisipa la fó esplikasaun kona-ba rezultadu enkontru ba jornalista sira ne’ebé hein hela iha fatin.
Enkontru ne’e akontese hafoin enkontru semanál entre Prezidente Repúblika, José Ramos-Horta, no Primeiru-Ministru, Kay Rala Xanana Gusmão, ne’ebé hala’o iha oras 09:00 dadeer, tuir ajenda ofisiál.
Tuir ajenda ne’e, iha oras 10:00 dadeer, Prezidente Repúblika kontinua enkontru ho membru Konsellu Superior Magistratura, ne’ebé durante oras rua no balun.
Enkontru ne’e partisipa husi Primeiru-Ministru Kay Rala Xanana Gusmão, Ministru Justisa Sérgio da Costa Hornai, Prezidente Tribunál Rekursu Afonso Carmona, Koordenadora Reforma Setór Justisa Lúcia Lobato, no reprezentante sira seluk husi setór judisiál.
Hafoin enkontru remata, Primeiru-Ministru Kay Rala Xanana Gusmão sai uluk husi salaun enkontru. Bainhira jornalista sira husu kona-ba rezultadu enkontru, Xefe Governu la fó deklarasaun.
Ministru Justisa Sérgio da Costa Hornai, ne’ebé sai tuir mai, mós la fó informasaun ba jornalista sira kona-ba pontu sira ne’ebé diskute durante enkontru.
Enkuantu ne’e, Prezidente Tribunál Rekursu Afonso Carmona, bainhira jornalista sira husu atu fó komentáriu, hatete de’it, “Ha’u liu husi kotuk”, la fó esplikasaun seluk kona-ba enkontru ne’e.
Bazeia ba observasaun Média Democracia iha fatin, ekipa mídia Prezidénsia Repúblika nian muda sira-nia preparasaun ba Salaun Xina, tanba iha ajenda enkontru seluk ne’ebé sei hala’o iha oras 12:30, entre Prezidente Repúblika José Ramos-Horta no Vise-Primeiru-Ministru no Ministru Defeza Austrália, Richard Marles, iha Palásiu Prezidensiál, Bairu-Pite.
Maski enkontru Konsellu Superior Magistratura remata ona, to’o jornalista sira hein no buka informasaun iha fatin, seidauk iha autoridade ida ne’ebé fó esplikasaun públika kona-ba rezultadu enkontru ne’e.
Reportajen: Octaviana da Costa
Foto: Octaviana da Costa