Díli, 27 Outubru 2026 (Média Democracia) – Hospitál Nasionál Guido Valadares (HNGV) hahú ona teste eskrita ba aplikante na’in 4.706 ne’ebé pasa ba faze daruak iha prosesu rekrutamentu ba kareira espesiál, husi loron 26 to’o 30 Outubru no sei kontinua iha loron 4 no 5 Novembru 2026. Husi totál aplikante na’in 8.084 ne’ebé rejista, aplikante na’in 4.706 mak hetan oportunidade atu kontinua ba faze daruak.
Diretór Servisu Apoiu Diagnóstiku no Terapéutiku HNGV, Vidal de Jesus Lopes, hatete katak teste eskrita ne’e hala’o tuir kalendáriu ne’ebé organiza ona, atu avalia kandidatu sira-nia koñesimentu antes avansa ba faze tuirmai.
“Agora daudaun ita fó teste eskrita ba faze daruak ba aplikante na’in 4.706, hahú husi ohin, loron 26, to’o loron 5 fulan Novembru tinan ne’e,” dehan Vidal de Jesus ba jornalista sira iha Komisaun Funsaun Públika, Matadouro, Díli, Segunda-feira (26/10).
Nia esplika , husi aplikante na’in 8.084 ne’ebé rejista ba prosesu rekrutamentu rejime espesiál, aplikante na’in 4.706 mak hetan aprovasaun atu tuir teste eskrita iha faze daruak.
Vidal mós ko’alia kona-ba reklamasaun ne’ebé kandidatu balun submete depois haree rezultadu seleksaun inisiál. Nia afirma katak kandidatu sira iha direitu atu hato’o reklamasaun, tuir prosedimentu no prazu ne’ebé estabelese.
Nia dehan, iha períodu reklamasaun ne’e, kandidatu na’in 1.744 mak hato’o reklamasaun. Ekipa júri halo verifikasaun ba dokumentu sira, inklui naran kandidatu ne’ebé mosu dala rua iha lista, naran ne’ebé la mosu iha sistema, no diploma orijinál ne’ebé nia kópia iha kór hanesan ho dokumentu orijinál.
Tuir Vidal, depois halo verifikasaun, kandidatu na’in 60 resin mak hetan oportunidade atu avansa ba faze daruak, tuir rezultadu avaliasaun dokumentu no prosesu verifikasaun ne’ebé hala’o.
Nia mós esplika pontu mínimu atu pasa teste eskrita mak 60. Kandidatu ne’ebé hetan pontu 59 ka menus la konsege pasa ba etapa tuirmai.
“Bainhira teste ida-ne’e remata, ekipa júri sei tuur hamutuk hodi determina kandidatu sira ne’ebé bele avansa ba faze terseiru, mak intervista,” nia esplika.
Iha fatin hanesan, aplikante Aguida Pereira de Araújo hatete katak nia sente kontente ho rezultadu teste eskrita ne’ebé nia hetan, maski iha matéria balun ne’ebé nia konsidera difísil. Aguida hetan pontu 62, ne’ebé liu pontu mínimu atu pasa ba faze tuirmai.
Aguida esplika katak durante preparasaun, nia estuda liu-liu matéria jerál, maibé matéria espesífika kona-ba área informajen no atendimentu iha ospitál mak sai barak liu iha teste eskrita.
“Ha’u sente kontente ho rezultadu ne’ebé ha’u hetan iha teste eskrita ne’e. Durante preparasaun, ha’u estuda matéria jerál, maibé matéria espesífika mak sai barak liu, liu-liu kona-ba atendimentu iha ospitál no kuidadu ba pasiente, inklui pediatria,” dehan Aguida Pereira de Araújo.
Nia aumenta katak pergunta balun inklui koñesimentu kona-ba oinsá atu sukat frekuénsia respirasaun labarik sira-nian no oinsá atu fó atendimentu ba labarik sira.
Maski matéria espesífika sai barak liu duké nia esperava, Aguida konsege hetan pontu 62 no konsidera rezultadu ne’e nu’udar rezultadu husi esforsu no preparasaun individuál.
“Ha’u hanoin katak teste ida-ne’e depende ba ita ida-idak nia esforsu no preparasaun. Se ita prepara an ho di’ak, ita bele hatán pergunta sira ho di’ak. Ha’u hetan pontu 62 no agradese ba rezultadu ne’e,” nia dehan.
Enkuantu ne’e, aplikante Adriano Olomau hatete katak nia sente triste tanba la konsege pasa teste eskrita, depois hetan pontu 46, ne’ebé menus husi pontu mínimu 60.
“Ha’u sente triste tanba la konsege pasa teste eskrita. Ha’u hetan pontu 46, ne’ebé menus husi pontu mínimu 60. Maski nune’e, ha’u simu rezultadu ne’e no konsidera katak kandidatu sira tenke simu rezultadu tuir pontu ne’ebé sira hetan,” dehan Adriano Olomau.
Adriano mós afirma, tuir nia observasaun, prosesu teste hala’o ho justisa, tanba kandidatu sira bele haree sira-nia rezultadu depois remata teste. Nia konsidera katak kandidatu sira tenke kompete tuir sira-nia kapasidade no preparasaun.
“Ha’u hanoin katak rezultadu ne’e depende ba ita ida-idak. Se ita prepara an ho di’ak, ita bele hetan rezultadu di’ak. Se la prepara, ita tenke simu rezultadu ne’ebé ita hetan,” nia dehan.
Adriano afirma, maski la konsege pasa iha teste eskrita ida-ne’e, nia sei kontinua prepara an atu partisipa iha oportunidade rekrutamentu seluk iha futuru.
Teste eskrita ne’e iha durasaun oras rua. Kandidatu sira ne’ebé remata sedu bele sai uluk, enkuantu kandidatu sira seluk bele kontinua halo no reviza sira-nia resposta to’o tempu teste remata.
Reportajen: Octaviana da Costa
Foto: Octaviana da Costa