Dili, 05 Novembru 2026 (Média Democracia) – Instituto Nasionál Kombate HIV-SIDA (INCSIDA), hamutuk ho parseiru nasionál no internasionál, kontinua prepara atividade komemorasaun Loron Mundíal Luta Kontra HIV/SIDA, ne’ebé sei hala’o iha área fronteira Timor-Leste no Indonézia, ho sentru atividade iha Munisípiu Bobonaro.
Prezidente INCSIDA, Daniel Marçal, iha entrevista ho Média Democracia, esplika preparasaun ba atividade ne’e envolve enkontru koordenasaun ho parseiru relevante sira hosi parte Timor-Leste no Indonézia, inklui autoridade lokál, instituisaun saúde no reprezentante komunidade sira hosi Atambua.
“Enkontru koordenasaun ne’e importante atu haree no asegura aspetu tékniku hotu-hotu, inklui programa atividade, apoiu logístiku no partisipasaun hosi instituisaun sira, hodi atividade ne’e bele lao ho di’ak no fó impaktu pozitivu ba komunidade iha área fronteira. Iha atividade ne’e, sei iha kompetisaun entre suku no komunidade sira iha área fronteira, ho objetivu atu atrai partisipasaun juventude no komunidade lokál sira, nune’e mós hametin relasaun amizade no kooperasaun entre Timor-Leste no Indonézia”dehan Prezidente INCSIDA, Daniel Marçal, iha Pantai Kelapa.
Nia esplika aleinde kompetisaun, organizadór sira sei hala’o konsultasaun saúde gratuita, teste HIV no kampaña sensibilizasaun ba komunidade sira, ho apoiu hosi servisu saúde munisipál Bobonaro, ospitál, ambulánsia no entidade saúde relevante sira.
Enkuantu preparasaun logístika, transporte, tenda no ekipamentu nesesáriu sei hetan apoiu hosi autoridade lokál Bobonaro no parseiru sira ne’ebé envolve iha preparasaun eventu ne’e.
“Iha loron komemorasaun, organizadór sira sei realiza mós konsertu músika no animasaun ho partisipasaun banda no artista sira hosi Timor-Leste, atu fó oportunidade ba komunidade sira atu partisipa iha ambiente edukativu no rekreativu”.nia dehan
Daniel Marçal haktuir atividade ne’e la’ós de’it atu komemora loron internasionál, maibé mós atu haforsa kooperasaun entre Timor-Leste no Indonézia iha prevensaun HIV/SIDA, tanba problema ne’e presiza atensaun no responsabilidade hamutuk hosi nasaun rua.
“Depois de atividade komemorasaun, INCSIDA sei kontinua servisu hamutuk ho parseiru hosi Indonézia atu hala’o kampaña edukasaun no sensibilizasaun iha área fronteira, husi Suai to’o Kusinema, hodi fó informasaun ba komunidade kona-ba dalan prevensaun no kontrolu transmisaun HIV.”nia haktuir
Iha parte seluk, kona-ba partisipasaun komunidade hosi Indonézia, Daniel Marçal esplika INCSIDA sei kontinua halo koordenasaun ho autoridade fronteira no imigrasaun, atu fasilita partisipasaun sidadaun sira ne’ebé hakarak partisipa iha atividade ne’e, liuliu sira ne’ebé presiza dokumentu viajem.
“Atividade prinsipál sei hala’o durante loron ida, maibé antes ne’e, durante loron tolu ka haat, sei hala’o ona kampaña sensibilizasaun no konsultasaun saúde iha suku sira besik fronteira.”nia esplika
Daniel Marçal haktuir, liuhusi atividade ne’e, INCSIDA hakarak hametin mensajen edukativu ba komunidade hotu, atu ema sira komprende katak prevensaun HIV/SIDA presiza responsabilidade individual, apoiu família no kooperasaun entre instituisaun sira.
Objetivu ikus hosi atividade ne’e mak hametin solidariedade no kooperasaun transfronteirisa entre Timor-Leste no Indonézia, hodi hamutuk luta kontra transmisaun HIV/SIDA no promove komunidade saudavel iha área fronteira.
Reportajen : Tomás dos Santos
Foto : Pedrito dos Santos