Dili, 05 Novembru 2026 (Média Democracia) – Ministériu Edukasaun (ME) hamutuk ho Governu Vietname forma ekipa konjunta ida atu identifika no avalia oportunidade kooperasaun iha área edukasaun, ho objetivu atu hadi’a kualidade edukasaun iha Timor-Leste, inklui dezenvolvimentu kuríkulu, digitalizasaun no introdusaun matéria Língua Inglés ba estudante sira iha klase 5 no 6 Ensinu Báziku.
Ministra Edukasaun, Dulce de Jesus Soares, afirma katak formasaun ekipa konjunta ne’e bazeia ba akordu kooperasaun ne’ebé nasaun rua iha ona, ho objetivu atu identifika área sira ne’ebé iha potensial atu dezenvolve liuhusi kolaborasaun bilateral.
“Agora ami forma ekipa konjunta ida ne’ebé sei servisu hamutuk atu esplora no avalia oportunidade kooperasaun entre Ministériu Edukasaun (ME) no Vietname, liuliu iha área sira ne’ebé iha potensial atu dezenvolve hamutuk,” ministra ne’e dehan ba jornalista sira iha Salaun VIP Ministériu Edukasaun, Vila Verde, kinta (05/11).
Dulce esplika katak, iha diskusaun ne’e, parte rua aborda mós oportunidade kooperasaun iha área digitalizasaun no dezenvolvimentu kuríkulu edukasaun, inklui planu atu introdús matéria Língua Inglés ba estudante sira iha klase 5 no 6 Ensinu Báziku.
Tuir ministra, to’o agora estudante sira hahú aprende Língua Inglés iha klase 7, enkuantu estudante sira iha klase 5 no 6 seidauk hetan matéria ne’e.
“Maibé, iha tinan oin ME sei koko atu introdús matéria Língua Inglés iha kuríkulu Ensinu Báziku ba klase 5 no 6, atu estudante sira bele hahú aprende língua ne’e sedu liután,” nia dehan.
Nia hatutan katak, planu introdusaun matéria Língua Inglés ba klase rua ne’e sei integra iha kuríkulu edukasaun, no agora daudaun ME sei iha prosesu preparasaun atu implementa planu ne’e iha tinan 2027.
Ministra ne’e mós afirma katak implementasaun planu ne’e sei inklui formasaun ba profesór sira no avaliasaun kona-ba nesesidade rekursu umanu, atu asegura apoiu ba prosesu reforma kuríkulu edukasaun.
Iha fatin hanesan, Embaixadór Estraordináriu no Plenipotensiáriu Repúblika Vietname ba Timor-Leste, Pham Binh Dam, afirma katak enkontru ne’e sai oportunidade importante atu hametin kooperasaun entre nasaun rua, liuliu hodi hadi’a kualidade edukasaun iha Timor-Leste.
“Ami prontu atu servisu hamutuk ho parseiru dezenvolvimentu sira seluk, hodi apoia Timor-Leste tuir nesesidade ne’ebé Timor-Leste iha iha área edukasaun,” embaixadór ne’e dehan.
Pham Binh Dam subliña katak Timor-Leste no Vietname iha ona relasaun bilateral ne’ebé metin. Tanba ne’e, ho Timor-Leste tama nu’udar membru ASEAN, importante ba nasaun rua atu kontinua hametin no dezenvolve kooperasaun iha área edukasaun iha futuru.
Reportajen: Octaviana da Costa
Foto: Octaviana da Costa