Dili, 10 Novembru 2026 (Média Democracia) – Centro Audiovisual Max Stahl Timor-Leste (CAMSTL) realiza semináriu nasionál ho tema “Reorientasaun Papel Juventude no Restaurasaun Valór Identidade Nasionál”, hodi hafoun memória koletiva kona-ba Masakre Santa Cruz no hametin konsiénsia juventude atu kontinua mantein valór luta, unidade no identidade nasionál, iha ámbitu komemorasaun tinan 35 Masakre Santa Cruz, ne’ebé akontese iha 12 Novembru 1991.
Semináriu ne’e nia objetivu mak atu promove reflesaun kona-ba papel juventude iha preservasaun memória istórika no restaurasaun valór identidade nasionál, hodi kontribui ba harii futuru Timor-Leste ne’ebé justu, responsável no sustentável.
Koordenadór Gabinete Apoiu Sosiedade Sivil, Gregório Saldanha “Muris”, iha ninia intervensaun, hato’o mensajen ba juventude atu aproveita tempu ho di’ak no prepara an ho koñesimentu, kapasidade no abilidade ne’ebé presiza iha mundu servisu.
Nia esplik, juventude iha períodu rezisténsia, maski kontinua fó prioridade ba estudu, maibé sira mós dedika sira-nia tempu no enerjia atu partisipa iha luta libertasaun nasionál hodi konquista independénsia Timor-Leste.
“Juventude ohin loron tenke prepara an ho di’ak, tanba mundu agora la’ós kompetisaun entre ema de’it, maibé mós kompetisaun iha área teknolojia, koñesimentu no kapasidade. Tanba ne’e, juventude tenke kontinua aprende no partisipa iha formasaun atu prontu hasoru dezafiu sira”, dehan Gregório Saldanha “Muris” ba jornalista sira iha salaun UNDIL, Dili, Tersa (10/11).
Gregório Saldanha mós hatete, merkadu traballu ohin loron ezije ema ida-idak atu iha koñesimentu kona-ba teknolojia no língua. Tanba ne’e, nia enkoraja juventude atu aproveita tempu hodi dezenvolve kapasidade no abilidade tuir nesesidade kampu servisu nian.
Nia mós subliña, jerasaun rezisténsia ne’ebé luta hamutuk to’o Timor-Leste hetan independénsia sei kontinua fahe esperiénsia no informasaun ba jerasaun foun, atu iha futuru sira bele asume responsabilidade iha jestaun no dezenvolvimentu nasaun.
Nia lembra katak, independénsia ne’e la’ós prezente ne’ebé ema fó de’it ba povu Timor-Leste, maibé rezultadu husi luta naruk ne’ebé presiza sakrifísiu, terus no lakon vida husi ema barak.
Iha parte seluk, Diretór Ezekutivu CAMSTL, Eudicitio Pinto, hateten, komemorasaun tinan 35 Masakre Santa Cruz importante tebes atu halibur fali juventude ne’ebé partisipa iha rezisténsia ho juventude ohin loron, hodi fahe memória no esperiénsia kona-ba sakrifísiu jerasaun uluk iha luta ba independénsia.
Nia esplika, durante períodu rezisténsia, juventude enfrenta sakrifísiu no sofrimentu oioin, maibé sira kontinua hametin esperansa atu haree Timor-Leste sai nasaun independente.
Tuir Eudicitio, juventude ohin loron presiza aprende husi istória no sakrifísiu jerasaun uluk, tanba iha sosiedade atual, komprensaun kona-ba unidade, respeitu malu no koordenasaun entre ema tenke kontinua hametin.
Nia konsidera, influénsia teknolojia no modernizasaun iha mundu atual bele afeta relasaun entre ema. Tanba ne’e, importante ba juventude atu la haluha valór unidade no identidade nasionál.
“Liuhusi semináriu ne’e, ami hakarak halibur fali ita hotu atu restaura valór unidade nasionál ne’ebé uluk ita iha. Juventude presiza hatene katak valór sira ne’e labele lakon ka haluha, tanba dignidade dala ruma bele muda mundu”, dehan Diretór Ezekutivu CAMSTL, Eudicitio Pinto.
Eudicitio mós husu ba jerasaun foun atu kaer metin prinsípiu no valór nasionál sira, hodi kontinua harii nasaun ho responsabilidade no evita hahalok ne’ebé bele hamosu fahe malu iha sosiedade.
Liuhusi atividade ne’e, CAMSTL hakarak fó oportunidade ba sobrevivente Masakre Santa Cruz sira atu fahe diretamente sira-nia esperiénsia ba juventude no partisipante sira, hodi jerasaun foun bele komprende kle’an liután istória luta, sakrifísiu no valór liberdade ne’ebé povu Timor-Leste hetan.
Semináriu nasionál ne’e envolve estudante sira husi eskola sekundária iha Dili, parseiru sira, organizasaun sosiedade sivíl no organizasaun naun-governamentál (ONG).
Reportajen: Octaviana da Costa
Foto: Octaviana da Costa