Maubara, 11 Novembru 2026 (Média Democracia) – Ekipa konjunta autoridade seguransa Timor-Leste halo apreensaun ba merkadoria hamutuk kaixa 82 ne’ebé suspeita kontrabandu, iha área kosteira Dair, Postu Administrativu Maubara, Munisípiu Likisá, iha kuarta-feira (11/11), tuku 02:00 madrugada.
Tuir informasaun ne’ebé Média Democracia asesu liuhosi pájina ofisiál Polísia Nasionál Timor-Leste (PNTL), apreensaun ne’e akontese depois ekipa konjunta simu informasaun husi fonte sira kona-ba movimentu ró rua ne’ebé suspeita mai husi nasaun viziñu Indonézia, lori merkadoria ilísita atu tama iha territóriu Timor-Leste liuhosi rota marítima.
Bazeia ba informasaun ne’e, ekipa konjunta halo vijilánsia no monitorizasaun intensiva iha área kosteira Timor-Leste. Liuhosi operasaun ne’e, ekipa konsege identifika ró ida ne’ebé transporta merkadoria suspeita ilegal, no hatun merkadoria hirak-ne’e iha área Dair, Maubara.
Merkadoria ne’ebé apreende hamutuk kaixa 82, kompostu husi kaixa boot hamutuk 7 ho marka oli mesin AHM MPX2, ho kapasidade 0,8 litru, no kaixa ki’ik hamutuk 75 ho marka oli ba transmisáun (Transmission Gear Oil).
Merkadoria hirak-ne’e suspeita transporta ilegalmente husi Indonézia tama mai iha territóriu Timor-Leste liuhosi rota marítima.
Iha momentu operasaun, ró ne’ebé transporta merkadoria hirak-ne’e la koopera ho autoridade, maibé abandona merkadoria iha fatin no suspeitu sira halai ho ró. Tanba ne’e, ekipa konjunta konsege asegura merkadoria hirak-ne’e atu sai evidénsia ba prosesu investigasaun.
Hafoin halo apreensaun, ekipa konjunta lori merkadoria hirak-ne’e ba baze Unidade Polísia Marítima (UPM) atu halo verifikasaun no rejistu. Depois prosesu verifikasaun remata, evidénsia no dokumentasaun relevante entrega ba Diresaun Servisu Investigasaun Kriminál (DSIK) atu kontinua investigasaun.
Prosesu investigasaun sei kontinua antes aprezenta kazu ne’e ba Ministériu Públiku no tribunál kompetente, hodi foti desizaun tuir lei ne’ebé vigora iha Timor-Leste.
Operasaun konjunta ne’e envolve Unidade Polísia Marítima (UPM), Autoridade Aduaneira (AA), Diresaun Servisu Investigasaun Kriminál (DSIK), Diresaun Servisu Informasaun Polísia (DSIP), Polísia Nasionál Timor-Leste (PNTL), Polísia Sientífika Investigasaun Kriminál (PCIC), D2 F-FDTL, S2 Unidade FALINTIL-F-FDTL, N2 Komponente Naval no Servisu Nasionál Intelijénsia no Estratéjia (SNIE).
Kolaborasaun entre instituisaun seguransa no autoridade kompetente sira importante tebes atu hametin vijilánsia iha fronteira marítima, kombate atividade kontrabandu no prevene entrada merkadoria ilegal ne’ebé bele viola lei no regulamentu sira ne’ebé vigora iha Timor-Leste.
Reportajen: Octaviana da Costa
Foto: PNTL