Dili, 16 Novembru 2026 (Média Democracia) – Polísia Nasionál Timor-Leste (PNTL) kaptura ona suspeitu nain-rua ho inisiál H no A, ne’ebé deskonfia envolve iha kazu konfrontu entre membru komunidade no membru Konsellu Polisiamentu Komunitáriu (KPK), ne’ebé akontese iha Bairu Tunalaran, Suku Vila Verde, Postu Administrativu Vera Cruz, Munisípiu Dili.
Komandante PNTL Munisípiu Dili, Komisáriu Asistente Polísia Orlando Gomes, hateten, kaptura ne’e hala’o depois akontesementu ne’ebé kauza membru PNTL ida hetan kanek iha inus tanba atake husi suspeitu sira durante intervensaun iha fatin akontesementu.
Orlando Gomes esplika, molok akontesementu ne’e, PNTL estabelese ona postu polísia ida iha área Tunalaran atu halo prevensaun no responde lalais ba problema sira ne’ebé bele mosu, hamutuk ho membru Konsellu Polisiamentu Komunitáriu (KPK).
Nia hateten katak, durante akontesementu, membru komunidade Tunalaran hamutuk ho KPK identifika suspeitu ida no ba nia hela-fatin. Maibé, suspeitu sira halo provokasaun no tenta atu asalta membru KPK, nune’e membru PNTL ne’ebé iha postu besik fatin akontesimentu ba atu haketak no kontrola situasaun.
Maski nune’e, durante intervensaun, suspeitu sira ataka membru PNTL ida to’o nia sofre kanek iha inus no ran sai.
Tanba situasaun ne’e, PNTL husu apoiu husi Task Force, Patrulla Vera Cruz no Unidade Intelijénsia atu halo operasaun iha fatin akontesimentu. Liuhusi operasaun ne’e, PNTL konsege kaptura suspeitu sira no lori ba Esquadra PNTL Vera Cruz atu kontinua prosesu tuir lei.
“Agora dadaun ami kontinua halo operasaun atu buka suspeitu sira seluk ne’ebé envolve iha problema ne’e. Ohin ami konsege kaer tan suspeitu balu no sei kontinua prosesu, tanba kazu ne’e tama ona iha kompeténsia autoridade judisiária, ne’ebé sei aprezenta ba Ministériu Públiku (MP),” dehan Komandante PNTL Munisípiu Dili, Komisáriu Asistente Polísia Orlando Gomes, ba jornalista sira iha nia knaar-fatin, Caicoli, Segunda-feira (16/11).
Orlando informa, suspeitu ho inisiál H no A sei liu hosi prosesu identifikasaun durante oras 12. Depois prosesu identifikasaun remata, sei hatama sira ba detensaun durante oras 72, molok kontinua prosesu legal tuir prosedimentu ne’ebé vigora.
Nia hatutan, konflitu ne’e hahú husi provokasaun iha área Tunalaran, ne’ebé hamosu konfrontu entre parte sira no ikusmai kauza membru PNTL ida hetan atake durante intervensaun atu kontrola situasaun.
Reportajen: Octaviana da Costa
Foto: Estefania
