Dili, 13 Novembru 2026 (Média Democracia) – Vise-Primeiru Ministru (VPM), Mariano Assanami Sabino, apela ba sidadaun hotu, liuliu juventude, estudante, família no inan-aman sira, atu kontinua hametin unidade nasionál no promove dame, hodi valoriza no preserva memória kona-ba luta no sakrifísiu povu Timor-Leste nian durante Masakre Santa Cruz, ne’ebé akontese iha 12 Novembru 1991.
VPM Mariano Assanami Sabino, ne’ebé reprezenta Primeiru-Ministru Kay Rala Xanana Gusmão, afirma, loron 12 Novembru la’ós de’it loron feriadu, maibé mós momentu importante atu fó oportunidade ba sidadaun hotu hodi halo reflesaun no hanoin fila fali sakrifísiu ne’ebé povu Timor-Leste halo durante luta ba libertasaun nasaun.
Nia esplika, unidade nasionál ne’ebé Timor-Leste iha ohin loron harii liuhusi sakrifísiu no ran husi povu Timor-Leste. Maski nune’e, to’o ohin loron, sei iha vítima lubuk ida ne’ebé seidauk identifika no halibur sira-nia restu mortais. Tanba ne’e, Semitériu Santa Cruz sai mós nu’udar Jardín dos Heróis, fatin ne’ebé simboliza no fó onra ba sira ne’ebé lakon sira-nia vida ba libertasaun nasaun.
Nia enfatiza, ba jerasaun ohin no futuru, sakrifísiu ne’e tenke sai hanorin no inspirasaun atu kontinua hametin unidade nasionál, solidariedade no promove dame iha Timor-Leste.
“Ba juventude, família no inan-aman sira hotu, sidadaun Timor-Leste iha rai laran no rai li’ur, ita tenke kontinua hametin kompromisu no fó onra ba sira ne’ebé la iha ona. Unidade nasionál tenke metin nafatin, maski ita mai husi partidu polítiku no organizasaun oioin, maibé ita hun ida de’it, Timoroan ida de’it, objetivu ida de’it no dalan ida de’it atu kontinua harii nasaun no dezenvolve povu ida-ne’e,” dehan VPM Mariano Assanami Sabino iha nia diskursu, iha Santa Cruz, Kinta (12/11).
Iha parte seluk, Prezidente Komité 12 de Novembru, Gregório Saldanha (Mouris), iha nia diskursu afirma, ran lulik, ran manas, ran asuwain no ran unidade nasionál ne’ebé fakar iha Santa Cruz reprezenta kontinuidade sakrifísiu povu Timor-Leste nian durante luta ba libertasaun nasaun.
“Ran lulik, ran manas, ran asuwain, ran unidade nasionál ne’ebé fakar iha Santa Cruz, hatutan ran sira hotu ne’ebé fakar ba ita-nia rai nia libertasaun tinan ba tinan kotuk, hanesan paktu unidade nasionál ne’ebé ajuda ita luta atu bele manan independénsia nasionál,” afirma Gregório Saldanha.
Gregório Saldanha mós husu ba sidadaun hotu atu renova fali kompromisu no paktu unidade nasionál, hodi hametin kooperasaun no kontribui ba dezenvolvimentu nasionál.
Nia apela mós ba lideransa hotu atu kontinua halo diálogu no buka entendimentu malu, tanba povu Timor-Leste presiza unidade nasionál ne’ebé forte atu hametin estabilidade no harii nasaun ba futuru.
Reportajen: Octaviana da Costa
Foto: Estefania