Dili, 17 Novembru 2026 (Média Democracia) – Funsionáriu Korpu Bombeirus Timor-Leste hamutuk na’in-408 ezije Governu atu selu osan alimentasaun ne’ebé seidauk simu durante fulan-hitu (7), hahú husi fulan Maiu to’o Novembru 2026. Ezijénsia ne’e hato’o liuhusi konferénsia imprensa, ne’ebé hala’o iha edifísiu Bombeiros Caicoli, Díli, Segunda-feira (17/11), hodi husu autoridade relevante atu rezolve problema ne’e lalais.
Portavós Korpu Bombeirus Timor-Leste, Manuel dos Reis, hateten funsionáriu Bombeirus sira husi munisípiu hotu-hotu halibur hamutuk atu hato’o sira-nia ezijénsia kona-ba osan alimentasaun ne’ebé Governu seida’uk selu.
“Ami nia objetivu ohin mai iha ne’e, Bombeirus Timor-Leste, ami atu ezije de’it kona-ba osan alimentasaun ne’ebé ami Bombeiru husi munisípiu hotu-hotu hahú husi fulan Maiu to’o oras ida-ne’e, Governu seidauk selu ami,” Manuel dos Reis hateten iha konferénsia imprensa ne’ebé hala’o iha Bombeiros Caicoli, Segunda-feira (17/11).
Antes ne’e, Bombeirus Munisípiu Baucau halo ona konferénsia imprensa no submete karta ba entidade relevante, hodi husu solusaun kona-ba problema ne’e. Maibé, to’o agora seida’uk hetan resposta.
Nia hatutan karta ne’e submete ona iha loron 27 fulan Outubru 2026, maibé to’o agora seida’uk hetan rezultadu. Tanba ne’e, funsionáriu Bombeirus sira fó ultimatu ba autoridade relevante atu fó resposta ba sira-nia ezijénsia, tanba sira enfrenta ona difikuldade atu asegura nesesidade lorloron, inklui prepara hahán.
“Ami sei la hapara, ami sei kontinua to’o Primeiru-Ministru, tanba orsamentu iha oras ne’e sira nonok hela. Atu uza osan ne’e ba halo saida? Iha ne’ebá bele foti montante ida ba montante seluk, maibé osan ba alimentasaun labele? Tanba ne’e mak ami ezije,” nia dehan.
Iha fatin hanesan, funsionáriu Bombeirus, Nazario Soares, haktuir prosesu atu buka solusaun ba problema ne’e kleur ona. Maski sira submete ona karta ba autoridade relevante, maibé seida’uk hetan resposta, enkuantu sira kontinua hala’o kna’ar tuir sira-nia responsabilidade.
“Ami Bombeirus Timor-Leste marka prezensa iha fatin ida-ne’e atu hatete, ami la mai julga ami-nia lideransa, maibé ami husu atu sira rezolve ami-nia problema ne’e lalais. Ohin loron ne’e tenke fó rezultadu ba ami. Se hateten katak osan ne’e iha, tenke esplika prosesu ne’e oinsá; se la iha, mós tenke esplika mai ami razaun ne’e,” Nazario Soares dehan.
Nia afirma funsionáriu Bombeirus sira kumpre ona sira-nia dever tuir Lei Estatutu Funsaun Públika, Artigu 49.º. Tanba ne’e, sira husu atu hetan sira-nia direitu, liuliu osan alimentasaun ne’ebé seidauk selu.
Tanba ne’e, reprezentante Bombeirus sira husu ba Sekretáriu Estadu ba Autoridade Protesaun Sivíl no Prezidente Autoridade Protesaun Sivíl atu tuur hamutuk ho sira, hodi buka solusaun ba problema ne’e iha loron hanesan.
To’o notísia ne’e publika, Média Democracia seida’uk konsege hetan konfirmasaun husi autoridade relevante, liuliu Sekretáriu Estadu ba Protesaun Sivíl no Prezidente Autoridade Protesaun Sivíl. Tuir informasaun ne’ebé Média Democracia hetan, parte sira konkorda ona atu hasoru malu hodi buka solusaun ba problema ne’e antes fó deklarasaun ba média.
Reportajen: Octaviana da Costa
Foto: Estefania
