ONG Ba Futuru, Hametin Feto Nia Fiar-an no Kapasidade Ekonómika Liuhusi Fórum Nasionál

 

Dili 19/11/2026 (Media Democracia) –ONG Ba Futuru realiza Fórum Nasionál ba feto empreendedora sira ho tema “Hametin Feto Nia Fiar-an no Kapasidade Ekonómika ba Futuru Ne’ebé Nabilan”. Fórum ne’e hala’o durante loron ida, ho objetivu atu hametin feto sira nia kapasidade empreendedorizmu, independénsia ekonómika no fiar-an iha foti desizaun kona-ba jestaun finanseira no dezenvolvimentu negósiu. Atividade ne’e realiza iha Salaun Konferénsia Tower, Fatuhada, Dili, quinta-feira, 19 Fevereiru 2026.

Atividade ne’e hala’o nu’udar parte ida husi programa ONG Ba Futuru nian, liuhusi projetu “Proteje Feto no Labarik, Dezenvolvimentu Ekonómiku, Promosaun Dame no Demokrasia”, ne’ebé envolve feto empreendedora individuál no membru grupu poupansa no empresta osan hamutuk feto na’in 60, mai husi Munisípiu Covalima no Ermera.

Diretora Ezekutiva ONG Ba Futuru, Judith Maria de Sousa, hateten projetu ne’e fó apoiu ba feto sira atu aumenta koñesimentu, abilidade no fiar-an iha jestaun finanseira no dezenvolvimentu negósiu.

“Liuhusi informasaun kona-ba rai no empresta osan, feto sira la’ós de’it aprende atu rai no jere sira-nia osan rasik, maibé mós aprende atu sai independente liután, iha kapasidade atu foti desizaun kona-ba sira-nia rendimentu no iha konfiansa atu kontinua dezenvolve no habelar sira-nia negósiu hodi hadi’a ekonomia no bem-estar família nian”, dehan Judith Maria de Sousa.

Nia mós manifesta orgullu no satisfasaun ba komitmentu no rezultadu ne’ebé ekipa projetu konsege atinji durante tinan tolu iha implementasaun programa iha Munisípiu Covalima no Ermera.

Nia hein esperiénsia no koñesimentu ne’ebé feto sira hetan sei kontinua sai motivasaun ba malu, hodi hametin independénsia ekonómika no promove foti desizaun hamutuk iha família.

Iha parte seluk, Sekretária Estadu ba Igualdade (SEI), Elvina Sousa Carvalho, afirma Governu kontinua hametin kolaborasaun ho parseiru dezenvolvimentu sira atu apoia no reforsa kapasidade ekonómika benefisiáriu sira, hodi alkansa independénsia ekonómika no finanseira.

Elvina Sousa Carvalho konsidera partisipasaun no komitmentu Governu iha Fórum Nasionál ne’e importante tebes, tanba sai oportunidade atu fó apoiu no orientasaun ba grupu benefisiáriu sira ne’ebé hala’o atividade produtiva no empreendedorizmu.

“Governu, hamutuk ho parseiru sira, iha komitmentu atu kontinua dezenvolve programa ne’ebé bele hametin kapasidade ekonómika benefisiáriu sira, atu nune’e sira bele sai independente ekonómika no finanseiramente, no kontribui ba dezenvolvimentu nasionál”. Nia dehan

Aleinde ne’e, Elvina Sousa Carvalho mós temi programa fundu rotativu nu’udar mekanizmu importante ida atu apoia grupu benefisiáriu sira. Liuhusi programa ne’e, kada grupu sei hetan fundu ho montante aproximadu USD 2.000 atu dezenvolve atividade ekonómika produtiva.

“Bainhira grupu ida konsege hala’o atividade ekonomia no hetan rezultadu, fundu ne’ebé simu sei transfere ba grupu seluk, atu fó oportunidade ba grupu sira seluk atu hahú no dezenvolve sira-nia atividade produtiva. Ho mekanizmu fundu rotativu ne’e, apoiu finanseiru sei kontinua to’o ba grupu benefisiáriu barak, hodi fó oportunidade ba feto sira atu hametin sira-nia negósiu no independénsia ekonómika. Kona-ba orsamentu, Sekretária Estadu ba Igualdade ne’e temi montante orsamentu jerál USD 1,8 miliaun, ne’ebé inklui alokasaun ba implementasaun programa fundu rotativu”. Nia afirma

Iha Fórum Nasionál ne’e, partisipante sira mós hetan oportunidade atu rona esperiénsia no motivasaun husi oradór sira kona-ba jestaun negósiu, prosesu harii kooperativa, hametin fiar-an iha foti desizaun no servisu hamutuk iha grupu.

Aleinde diskusaun no partilla esperiénsia, organiza mós aprezentasaun no espozisaun produtu lokál husi grupu feto sira mai husi Covalima no Ermera, hodi promove produtu ne’ebé sira produz no aumenta oportunidade merkadu ba negósiu sira.

Tuir Koordenadór projetu “Proteje Feto no Labarik, Dezenvolvimentu Ekonómiku, Promosaun Dame no Demokrasia”, Yohanes Bouk, hateten nia sente kontente tanba bele lidera implementasaun projetu ne’e, ne’ebé fó formasaun no apoiu ba feto empreendedora individuál no grupu sira.

“Benefisiáriu sira hatudu progresu di’ak iha implementasaun planu asaun ne’ebé sira estabelese depois simu formasaun. Progresu ne’e sai baze ba sira atu partisipa iha Fórum Munisipál no kontinua mai reprezenta sira-nia kolega feto sira iha Fórum Nasionál. Total partisipante feto na’in 60 ne’e kompostu husi membru grupu feto na’in 19 no feto empreendedora individuál na’in 11 husi Covalima, no membru grupu feto na’in 23 ho feto empreendedora individuál na’in 7 husi Ermera.” Nia afirma

Parte seluk tuir  partisipante , Natalia de Jesus Araujo, feto empreendedora ho idade tinan 38, membru Grupu Hametin, husi Suku Liho, Postu Administrativu Railaco, Munisípiu Ermera, hateten  nia sente kontente tanba hetan koñesimentu foun kona-ba jestaun negósiu no jestaun finanseira.

“ Konsidera esperiénsia no motivasaun ne’ebé hetan iha fórum munisipál no nasionál nu’udar apoiu importante atu hametin fiar-an no kontinua dezenvolve negósiu iha futuru. liuhusi programa ONG Ba Futuru, nia konsege hametin kapasidade atu foti desizaun kona-ba gastu família, harii kios, suporta edukasaun oan sira no envolve an iha grupu kooperativa rua atu rai osan ba future”.Nia relata

Partisipante sira kompostu husi feto empreendedora no membru grupu feto ne’ebé envolve ona iha programa ONG Ba Futuru durante períodu 2024 to’o 2026. Durante períodu ne’e, sira hetan formasaun kona-ba hametin ekonomia feto, rezolusaun konflitu, prevensaun violénsia bazeia ba jéneru, poupansa no empresta osan, dixiplina pozitiva no protesaun ba labarik

Fórum Nasionál ne’e hetan apoiu finanseiru husi MISEREOR nu’udar doadór prinsipál, ho ko-finansiamentu husi Kindermission. ONG Ba Futuru mós servisu hamutuk ho parseiru sira, inklui Sekretaria Estadu ba Igualdade (SEI), Sekretaria Estadu ba Kooperativa (SECoop), Autoridade Munisipál, autoridade postu administrativu no autoridade lokál sira iha área implementasaun projetu.

Reportajen : Tomás dos Santos

Foto : Tomás dos Santos

 

Tinggalkan Balasan

Alamat email Anda tidak akan dipublikasikan. Ruas yang wajib ditandai *