Banku de Sangue HNGV Rekolla Raan hamutuk 2.000 Durante Fulan Tolu

Dili, 18 Novembru 2026 (Média Democracia) – Departamentu Banku de Sangue   iha Hospital Nasionál Guido Valadares (HNGV) konsege rekolla raan hamutuk unidade 2.070 durante períodu fulan Jullu to’o Setembru 2026, atu asegura disponibilidade raan ba pasiente sira ne’ebé presiza transfusaun.

Xefe Departamentu Banku de Sangue   HNGV, Alexandrino Mendonça, hatete , tuir dadus estatístika departamentu nian, durante trimestre datoluk (Q3) tinan 2026, Banku Raan konsege rekolla raan hamutuk unidade 2.070, enkuantu kuantidade raan ne’ebé utiliza ba transfusaun hamutuk unidade 2.188.

Nia esplika, diferensa entre kuantidade raan ne’ebé rekolla no ne’ebé utiliza ba transfusaun akontese tanba raan ne’ebé rekolla sei prosesu hodi fahe ba komponente oioin, hanesan plasma no komponente seluk, ne’ebé iha nesesidade diferente.

“Iha Q3 ne’e, totál raan ne’ebé ita rekolla hamutuk 2.070, maibé raan ne’ebé ita utiliza ba transfusaun hamutuk 2.188,” Alexandrino Mendonça hatete ba jornalista sira iha nia fatin servisu, Kuarta-feira (18/11).

Nia kontinua esplika, durante fulan Jullu Banku Raan rekolla raan unidade 836, Agostu unidade 579 no Setembru unidade 655.

Além ne’e, nia mós hateten tipu raan AB mak difísil liu atu hetan, tanba númeru pasiente ne’ebé presiza tipu raan ne’e menus, no doadór ho tipu raan AB mós limitadu.

“Stock raan ne’ebé ita susar liu atu hetan mak tipu AB, tanba tuir dadus ne’ebé iha, pasiente ne’ebé interna ho tipu raan AB iha númeru menus iha ita-nia rain. Tanba ne’e, tipu raan ne’e ladún barak,” nia dehan.

Nia informa, stock raan ne’ebé disponivel iha Banku Raan iha momentu ne’e hamutuk unidade 53, kompostu husi tipu raan A unidade 4, tipu B unidade 13, tipu O unidade 27 no tipu AB unidade 9.

Maski nune’e, nia hateten stock ne’e temporáriu de’it, tanba disponibilidade raan depende ba númeru doadór sira ne’ebé mai halo doasaun no nesesidade pasiente sira iha ospitál.

Nia mós hateten atividade doasaun raan kontinua hala’o durante loron tomak, no kuantidade stock bele aumenta ka tun tuir situasaun doasaun no nesesidade atendimentu saúde.

Iha parte seluk, Alexandrino rekoñese katak Banku de Sangue   hasoru difikuldade tanba falta plastik atu rai raan durante fulan ne’e. Plastik hirak-ne’e tenke sosa liuhusi Institutu Nasionál Farmásia no Produtu Médiku (INFPM), ne’ebé hala’o prosesu kompras iha rai li’ur, nune’e presiza tempu atu to’o iha Timor-Leste.

Maski nune’e, nia afirma problema ne’e rezolve ona iha loron Domingu, bainhira ekipa Banku de Sangue  ba foti plastik raan hodi lori mai HNGV, atu garante kontinuidade servisu atendimentu ba pasiente sira.

“Ha’u garante katak agora doasaun raan no atendimentu lao fali hanesan baibain. Kona-ba distribuisaun raan, Banku Raan fó prioridade ba pasiente sira ne’ebé interna iha HNGV, depois mak atende ospitál referál sira, hanesan Ospitál Maubisse no Ospitál Baukau, inklui klínika sira ne’ebé iha akordu ho Ministériu Saúde,” nia afirma.

Nia aumenta katak Banku Raan mós fornese raan ba Klínika Maternidade Fatumeta, tuir nesesidade pasiente sira, liuliu bainhira kazu dengue aumenta no hamosu nesesidade transfusaun raan.

Além ne’e, nia esplika katak klínika sira ne’ebé presiza raan tenke haruka uluk amostra raan ba Banku Raan atu halo teste no verifikasaun, antes sira bele mai foti raan tuir nesesidade.

Atu asegura disponibilidade raan, Banku de Sangue   mós iha akordu servisu hamutuk ho Cruz Vermelha Timor-Leste (CVTL), liuliu iha área sosializasaun, aproximasaun no mobilizasaun doadór voluntáriu iha komunidade no instituisaun sira.

Tuir dadus ne’ebé aprezenta, doadór voluntáriu husi instituisaun sira hamutuk ema na’in 252, kompostu husi mane na’in 188 no feto na’in 64. Enkuantu doadór individuál ne’ebé mai diretamente ba Banku de Sangue   hamutuk ema na’in 69, kompostu husi mane na’in 58 no feto na’in 11.

Reportajen: Octaviana da Costa

Foto: Octaviana da Costa

Tinggalkan Balasan

Alamat email Anda tidak akan dipublikasikan. Ruas yang wajib ditandai *