Dili, 11 Agostu 2025 (Média Democracia) – Asosiasaun Akadémika Estudantíl UNTL liuhusi komunikadu ne’ebé realiza iha loron sexta-feira semana ne’e konsidera katak UNTL la’os ona fatin ba prodúz matenek nomos lia- loos tuir Lema UNTL nian maibé sai fali fatin ba krime no sai fatin ne’ebé jestór sira aproveita hodi atinji sira nia interese pesoál no grupu balun nia interese, komunikadu ne’e realiza iha kampus central UNTL.
Portavós Rio Davio, liuhusi konferensia imprensa ne’ebé hala’o iha Kampus Central UNTL, informa ba públiku katak relasiona ho asaun ne’ebé akontese iha Universidade Nasional Timor Lorosa’e (UNTL), iha loron 06/08/2025 Polícia Nacional Timor-Leste (PNTL), liuhusi Diresaun Servisu Investigasaun Kriminal (DSIK), ezekuta mandadu Tribunal Primeira Instansia Judicial Dili ho nu. 0186/25 PSIK halo buska no aprensaun ba Gabinete Reitor no estrutura universidade balun tanba deskonfia pratika krime falsifikasaun dokumentu no anotasaun téknika.
“Buska aprensaun ne’e asosiasaun akadémika estudantíl konsidera katak UNTL la’os ona fatin ba produs matenek no lialoos tuir lema UNTL nian, maibé sai fali fatin ba krime no sai fatin ne’ebé jestor sira aproveita hodi atinji sira nia interese pesoal no grupu balun nia interese, ho situasaun ne’ebé akontese dadaun ne’e asosiasaun akadémika estudantíl haree katak la’os de’it kazu rua ne’e mak akontese maibé iha mós kazu seluk hanesan, mal jestaun ba osan kaixa UNTL ne’ebé kada tinan estudante admitidu kontribui $20, inklui gasta osan la tuir nesesidade ida ne’ebé resulta kantina Universidade to’o agora la funsiona, maski Universidade fakar osan hodi konstrui kantina refere, iha mós kazu sira seluk abuzu poder no kazu asediu seksual ne’ebé akontese iha Fakuldade FMCS.” Dehan portavoz Rio Davio, liuhusi konferensia imprensa iha kampus Central UNTL, sexta-feira.
Nia hatutan, Estrutura Universidade no manorin sira tenta proteze malu husi sala, ne’ebé sira pratika, tanba realidade hatudu kazu ne’ebé pratika husi manorin no kargu xefia balun iha Fakuldade Medicina Ciencia Saude (FMCS), hanesan abuzu poder no asediu seksual to’o agora seidauk iha desizaun final ba kazu refere, nune’e mós iha Fakuldade Filosofia iha kazu balun ne’ebé komete husi Eis-Dekanu to’o agora seidauk iha desizaun, ida ne’e hatudu mós katak orgaun universidade la iha seriedade ba resolve kazu iha UNTL no tenta sai protetor ba malu.
“Husu ba Pro-Reitor Asuntu Auditoria Garantia kualidade Interna atu kontinua halo servisu, liliu halo mós audit ba osan kaixa UNTL nia ne’ebé estudante sira kontribui no halo mós audit ba kantina ne’ebé konstrui iha kampus central to’o agora seidauk funsiona. Nune’e husu ba orgaun conselho disiplinar UNTL, atu halo mós investigasaun ba pesoal hirak ne’ebé pratika kazu iha universidade UNTL no aplika regra interna universidade nian no husu mós atu aselera kazu fakuldade Medicina Ciensia Saude (FMCS), ne’ebé to’o agora ladauk iha desizaun final ba profesór ne’ebé pratika asediu seksual no abusu poder.” Subliña portavoz Rio Davio
Nia husu ba orgaun masimu konsellu jeral UNTL, atu foti medida ruma tuir regra universidade nian, ba autór hirak ne’ebé notifikadu suspeita ba prosesu refere selae mak autór hirak ne’e nafatin pratika iregulariedade no hatun imajen Universidade Nasional Timor Lorosa’e (UNTL). nune’e mós husu ba estrutura ne’ebé agora daudaun suspeita hela ba prosesu judicial, atu rezigna an husi kargu ne’ebé atualmente ita-boot sira asumi hela, tanba aktu ne’ebé ita-boot sira pratika la hatudu lisaun di’ak.
Reportajen : Domingas
Foto : Domingas