Dili, 03 Outubru 2025 (Média Democracia) – Suku Seloi Kraik iha Aldei rua hanesan Aldeia Aimeta no Kablasi Munisipiu Aileu seidauk asesu ba iha Eleirisidade.
Iha entrevista ho Xefe Suku Seloi Kraik Munisipiu Aileu Silvestre P. Monteiro hateten, Aldeia rua hanesan Aimeta no Kablasi inklui mós komunidade balun hela iha estrada foun ne’ebé foin loke ne’e to’o agora sira seidauk asesu ba liña eletrisidade.
“Komunidade hela iha Aldeia rua ne’e hamutuk uma kaik atus-ualu resin seidauk asesu ba liña eletrisidade, ita bele dehan katak Aldeia rua ne’e hahu hela kedas husi tempu indonesia nian to’o agora.” Dehan Xefe suku ba jornalista sira hafoin entrevista iha MOP
Nia informa, komunidade hirak agora sei uza lampu solar ida habai iha loron, balun sei sunu lilin nomos balun uza lampu tradisional, no iha NGO ida mós apoiu lampu ba estudante no mestri sira nune’e bainhira iha tempo kalan estudante sira bele estuda.
“Ami hatama ona pedidu ba Autoridade Munisipiu no ami husu ona Autoridade Munisipiu atu bele mai koalia ho nasional, no ami mós halo diretamente pedidu ida mai nasional husu atu bele fornese eletrisidade ba komunidade iha aldeia rua, maibé seidauk hetan resposta husi parte relevante sira, ami nia pedidu mós dirije ona ba EDTL fulan ida liu ba, nune’e ho laran lu’ak ami husu ba ukun nain sira tau atensaun mós mai ami komunidade Aldeia rua ne’e.” Informa Xefe Suku Seloi Kraik Munisipiu Aileu Silvestre P. Monteiro
Nia reafirma, hanesan Autoridade Lokal seidauk simu resposta husi parte Autoridade Munisipiu nomos parte nasional nian, maibé iha ona informasaun balun katak tempu badak sei halo remata uluk servisu balun ne’ebé hala’o hela iha likidoe nomos servisu balun iha Aileu villa nian hanesan Autoridade Lokal nia esperansa ba oin katak tinan oin ka fulan oin mai komunidade aldeia rua ne’e bele asesu eletrisidade.
Reportajen : Domingas
Foto : Domingas