Dili, 5 Abril 2025 (Média Democracia) – Alfaesa reativa hikas atividade Padaria Brasão ho razaun kompañia refere kumpri ona rekezitus hirak ne’ebé fó husi Alfaesa, atividade reativa nee hala’o iha sexta-feira semana ne’e iha Padaria Brasão, Central Dili.
Iha entrevista ho Inspetora Alfaesa Odete da S. Viegas hateten, servisu ba iha inspesaun no fiskalizasaun ne’ebé institutu públiku Alfaesa hala’o regularmente durante ne’e hatudu resultadu husi Alfaesa nia servisu mak fó suspensaun ba iha operadores ekonomikus sira ne’ebé servisu irregularidade “kontra rekezitus” husi Alfaesa sempre foti asaun hodi fó infrasaun ka halo asesoria temporaria ba iha operadores ekonomikus sira ne’ebé hala’o sira-nia komersializasaun iha area komersiu, no industria nian la tuir rekezitu.
“Ita-boot sira hatene bainhira Inspitores sira tunbá iha fatin komersializasaun ida mak Padaria Brasão nian hanesan operadores ekonomikus ne’ebé komete irregularidade. entaun husi ne’ebá Alfaesa hala’o kedas asesoria temporaria “suspensaun” durante semana rua ita fó mós formasaun ba iha operadores ekonomiku ne’e rasik atu bele kumpri fali rekezitus ne’ebé alfaesa fó ba kompaña ne’e, felismente sira koopera di’ak ho Alfaesa no sira priense hotu ona rekezitus ne’ebé fó husi Alfaesa rasik, husi fali parte Alfaesa rasik hala’o ona reinspensaun dala rua ona husi loron 1 fulan abril sira konsege priense ona 95 porsentu kompaña refere kumpri ona rekezitus ne’ebé Alfaesa rasik fó ba sira no iha loron 3 fulan abril sira kompeleta ona rekezitus, signifika katak kompaña ne’e hakarak koopera no kolabora diak ho Alfaesa no sira mós kumpri duni rekezitus hirak nee.” Dehan Inspetora Alfaesa Odete da S. Viegas
Nia hatutan kompaña rasik hala’o ona sira-nia obrigasaun hodi hadia fatin ne’ebé sira halo komersializasaun produtu alimentasaun hanesan paun ne’ebé loron-loron komunidade sira sempre mai sosa hodi konsumu, Alfaesa mós sente orgullu, tanba kompaña rasik hakarak koopera no servisu ho Alfaesa hodi hadia sira-nia fatin produsaun paun, atu nunee kompaña bele hala’o fila-fali sira-nia produsaun.
“Antes ne’e Alfaesa detekta mak haree liubá saude hijene ne’ebé la dun konfortavel ba iha ema hotu, tan ne’e Alfaesa foti desizaun hodi taka temporaria ba iha fatin ne’e rasik, depois Alfaesa mós hetan produtus ne’ebé estragadus no balun nia data expiradu ona ho razaun hirak ne’e ita mós fó infrasaun ka rekezitus hirak ne’e ba kompaña, nune’e sira bele hadia fatin no hadia saude ijenia, ohin Alfaesa mai fali hodi haree sira kumpri duni kalae, felismente sira kumpri duni hodi hadia fali, entaun sira loke fila-fali sira-nia produsaun ba iha alimentasaun paun.” Hatutan Inspetora Alfaesa
Nia informa haree ba iha kondisaun ba produsaun alimentasaun agora daudaun Alfaesa observa katak diak tebes no tuir duni rekezitus ne’ebé fó husi alfaesa rasik, entaun Alfaesa hanoin katak ida ne’e diak tebes, nune’e bele hadia fali sira-nia prestasaun balun ba iha future, haree mós ba iha paun ne’ebé sira atu produs bele iha kondisaun ne’ebé favoravel ka fatin moos hodi garante ba iha konsumidores sira nia saude.
“Alfaesa sempre hateten ona katak, sempre fó sansaun ne’e iha rua ida sansaun primeiru maka taka provisoriu fatin refere nomos iha sansaun administrativu sira tenke kumpri sansaun administrative, hanesan Alfaesa mós haree ba iha erru ne’ebé kompaña rasik komete ne’e boot kalae, ba iha sansaun segundu nian ne’e agora daudaun sei iha hela prosesu nian laran, tanba ne’e Alfaesa sempre fó hanoin ba kompaña sira hotu ne’ebé atu loke produsaun alimentasaun ruma tenke tuir rekezitus ne’ebé iha ona.” Informa Odete da S. Viegas
Nia reafirma Alfaesa nafatin fó notifikasaun ba iha emprezariu sira ne’ebé la kumpri rekezitus sira katak, husu atu nafatin koopera durante loron tolunulu nia laran se liuhusi ida ne’e mak la iha resultadu Alfaesa notifika ona no fó kedas nia sansaun no selu mós osan hahu husi atus-rua limanulu ba leten haree mós ba iha erru ne’ebé kompaña ka emprerasiu sira ne’e halo, tanba rekezitus importante mak haree liubá iha ema nia saude, no emprezariu sira ne’ebé sei selu multa ne’e agora prosesu ona hein deit desizaun husi inspesaun hafoin bele fó sai ba publiku.
“Iha tinan 2025 iha fulan janeiru ita registu ona 20 operadores ekonomikus mak ita taka privisoriumente no notifikasaun iha Dili nomos iha Oecussi hanoin katak, ne’e foin hahu espera katak Alfaesa sei hala’o nia servisu hodi nafatin haree ba iha operadores ekonomikus sira ne’ebé hala’o sira-nia produsaun alimentasaun no xineses sira ne’ebé fa’an sasan iha loja atu nune’e bele garantia ba future.” Afirma Inspetora Alfaesa
Nia reforsa nafatin husu ba operadores ekonomikus sira atu nafatin kumpri rekezitus ne’ebé iha ona karik la kumpri maka hakarak ka lakoi Alfaesa tenke taka para hadia kondisaun atu nune’e bele fó duni prestasaun servisu ne’ebé dignu nomos garante ba iha ema hotu nia saude.
Reportajen : Domingas
Foto : Domingas