Dili, 11 Agostu 2025 (Média Democracia) – Alumni Departamentu Komunikasaun Sosiál DKS, Fakuldade Siénsia Sosiais no Polítika FSSP, realiza kongresu ba dalarua ho nia tema “Reenkontru Hodi Konsolida Unidade Alumni ba Reforsa Setór Komunikasaun iha Timor Leste” kongresu ne’e hala’o iha loron sabadu semana ne’e, iha loron 9 fulan Agostu tinan 2025, iha kampus Kaikoli Dili.
Iha entrevista ho Vice Decano III Asuntu Estudantil Faculdade Siensia Sosiais no Polítika Valenti Gusmão Laranjeira hateten, hakarak hato’o agradese ba iha komisaun organizadór/a ho nia ekipa tomak ne’ebé realiza ona atividade ida ohin no konvida mós fakuldade atu partisipa iha atividade ne’e no kongresu Alumni Departamentu Komunikasaun Sosiál, iha fakuldade siensia sosiais no politika iha UNTL.
“Atividade ida ne’e importante tebes tanba liuhusi kongresu ne’e ninia objetivu loloos mak oinsá ita atu halibur fila-fali alumni sira hahú husi ano letivu 2008 mai to’o iha 2020 ba sira ne’ebé remata ona nia estudu iha UNTL nomos halo revizaun ba iha estatutu ne’ebé durante ne’e estabelese iha asosiasaun ne’e rasik, nomos iha Departamentu Komunkasaun Sosial ne’e rasik halo reestrutura estatutu tuan ba iha estrutura foun.” Dehan Vice Decano III Asuntu Estudantil Faculdade Siensia Sosiais no Polítika Valenti Gusmão Laranjeira
Nia hatutan, husi kongresu ida ne’e ohin iha diskursu temi ona katak husi kongresu ne’e bele hasoru malu fali ho alumni sira tanba kleur ona la hasoru malu, entaun kongresu ida ne’e konvoka fila-fali alumni sira atu mai partisipa hodi husik saudades ba alumni sira no dosente sira nomos iha parte seluk bele hamoris ideia sira husi kada alumni atu bele lori asosiasaun ne’e ba iha future.
“Iha fakuldade ninian kontribuisaun maka durante ne’e ita halo hela servisu makas nomos fó hela atensaun no hanoin ba iha Departamentu Komunikasaun Sosiál atu estuda makas, laos ba alumni de’it maibé ba estudante tomak tanba iha moto Departamentu nian dehan “Sé ha’u la lee oinsá ha’u bele hakerek” tanba ne’e Fakuldade nafatin tau atensaun ba iha estudante sira kada Departamentu atu nune’e bele la’o nafatin ba futuru hodi hadi’a saida maka sira hakarak atinji iha sira nian mehi rasik.” Hatutan Vice Decano III Asuntu Estudantil Faculdade Siensia Sosiais no Polítika
Nia informa liga ba iha alumni sira husi Departamentu Komunikasaun Sosiál ne’e haree ba iha atividade ohin esperansa husi Vice-Dekanu sira sei lori naran ida asosiasaun ne’e sei morin iha komunidade nia leet ho esperensia ne’ebé sira iha no sira mós sei fahe sira-nia esperensia ne’ebé sira iha ba komunidade no estudante sira ne’ebé presiza sira nia tulun.
Hatutan husi komisaun organizadór Miguel Gonçalves dehan, atividade ida ohin ne’e atu hala’o kongresu ba daruak nian tanba kongresu primeiru ne’e iha kedas momentu kovid-19 nian, entaun iha ne’ebá atividade ne’e simplesmente de’it.
“Asosiasaun Alumni Departamentu Komunikasaun Sosiál ne’e harii iha 2020 nian ho ninian objetivu atu hametin lasu amizade entre alumni husi Komunikasaun Sosial ho Dosente sira iha Departamentu Komunikasaun Sosiál ne’e rasik.” Tenik Komisaun Organizadór Miguel Gonçalves
Nia informa, esperensa husi atividade kongresu daruak ida ohin ne’ebé realiza ho nia tema maka reenkontru hodi konsolida unidade alumni ba reforsa setór komunikasaun iha Timor Leste husi tema ne’e oinsa atu kria lasu di’ak ho Departamentu atu nune’e bele kontribui liuhusi material fíziku ka non-fíziku sira ne’ebé Departamentu presiza.
Reportajen : Domingas
Foto : Domingas