Dili, 23 Fevereiru 2026 (Média Democracia) – Alumni Parlamentu Foisa’e Timor-Leste realiza kompetisaun debate públiku ba estudante universitáriu no institutu públiku sira kona-ba Justisa klimátika no Finansiamentu klimátika, Empodera Feto no Foinsa’e sira ba Timor-Leste nia Rezilensia hodi hasa’e koñesimentu krítiku estudante sira nian no promove diskusaun públiku kona-ba klimátika no finansimentu klimatika iha Timor-Leste.
Objetivu husi atividade debate públiku ne’e atu promove partisipasaun foin-sa’e sira nian, espesifiku liubá debate públiku kona-ba klimátika ne’ebé kompetisaun ne’e rasik partisipa husi estudante sira, nune’e bele fahe ideia ho krítiku sira hodi buka solusaun ba problema mudansa klimátika.
“Ha’u hanoin estudante sira laos estuda akademiku de’it maibé sira mai iha fatin ida ne’e atu fahe sira nia ideia kona-ba tema mudansa klimatika.” Dehan Prezidente Alumni Parlamentu Foinsa’e, Bemvinda ba jornalista sira iha Nelayan Resto Bidau, segunda ne’e (23/02)
Prezidente Alumni Parlamentu Foinsa’e hatutan, APFTL realiza atividade ne’e hakarak fó espasu ba estudante sira, nune’e fó sai ideia ruma, aleinde ne’e halo deskusaun pro no kontra atu oinsá argumenta sira nia ideia ruma.
Atividade ida ne’e prepara orsamentu montante la boot ba manan na’in sira husi universidade tolu ne’ebé sei sai nu’udar manan na’in, no sira seluk ne’ebé la sai manan nain sei hetan sertifikadu de apresiasaun.
“Bainhira sira debate publiku kona-ba mudansa klimatika depois sai primeiru lugar sei hetan $600 no segundu lugar sei hetan $400 no terseiru lugar hetan $200.” Hatutan Prezidente Alumni Parlamentu Foinsa’e
Iha programa ne’e, APFTL serbisu hamutuk ho Oxfam iha Timor-Leste iha tinan 2023, dahuluk ne’e serbisu iha projeitu finansiamentu klimatika oinsá atu hasa’e konsiénsia ba publiku.
“APFTL iha programa jeral ne’ebé liga mudansa klimatika, nune’e fo formasaun ho sosializasaun maibé liuhusi diskusaun no uluk halo ho Ministériu relavante sira, depois ita halo deskusaun ho komunidade sira iha Munisipiu, ne’ebé ohin realiza atividade ida ne’e hodi debate publiku kona-ba mudansa klimatika.” Informa Prezidente Alumni Parlamentu Foinsa’e
Iha tinan 2023-2026 ho atividade finansiamentu klimatika nune’e APFTL hetan apoiu husi OXFAM iha Timor-Leste ho orsamentu montante rihun $90 ital.
Iha fatin hanesan, Cedelígio Moniz Estudante Unital hateten, ohin partisipa iha atividade ne’e la’os atu tuir de’it kompetisaun, maibé subtansial importante mak pasu de konsentizasaun.
“Oinsá mak bele iha koñesimentu ba mudansa klimátika, Aleinde ne’e mos oinsá bele divulga informasaun ba iha sosiedade, tanba iha planeta rai ida ne’e buat ne’ebé importante iha parte tolu de’it primeiru ita ema, ai-horis no animais.” Dehan Cedelígio Moniz Estudante Unital
Nune’e tema jeral iha variavel tolu importante hanesan, dahuluk justisa klimátika, daruak kona-ba kontribuisaun mudansa klimátika no impaktu husi mudansa klimátika ka tuir evolusaun sosiedade iha revolusaun, datoluk ema ne’ebe sai vulneravel ba mudansa klimátika mak inan-feton no labarik kiik-oan sira.
Nia hatutan, emosoes ne’ebé foti hodi halo debate ne’e pertinente duni halo diskusaun nune’e bele hafanu parte relevante sira hanesan Governu no Sosiedade Sivil sira hodi bele foti medida.
“Hanesan horikalan akontese udan boot oras tolu deit, maibé hamosu inundasaun boot iha fatin-fatin tama to’o ema nia kuartu no dapur laran ema deskansa la di’ak, Ita halo komparasaun mudansa klimátika tinan hitu (7), ba kotuk udan boot to’o tinan lima mós inundasaun la akontese hanesan ne’e, tanba fó espasu ba bee dalan, maibé agora la iha espasu ba bee dalan.” Hatutan Cedelígio Moniz Estudante Unital
Esplika kle’an liután, Diskusaun ne’e importante no determinante tebes ba ema nia moris, tanba ema nia moris ne’e intim ho natureza, se karik halo interven natureza ita bele mate, tanba ne’e mak mundu ohin loron iha nasaun hotu-hotu iha ona hanoin, oinsá bele hamenus gas no poluisaun ne’ebé suar makas.
Reportajen : Estefania
Foto : Estefania