Dili, 09 Fevereiru 2026 (Média Democracia) – Sekretariu Estadu Komunikasaun Sosial (SEKOMS) liuhusi Departementu ICT servisu hamutuk ho ChilFund Timor-Leste kria Website hodi apoiu labarik sira iha informasaun nomos ema hotu bele asesu servisu no atividade programa ChildFund nian liuhusi nia Website rasik.
Koordenador Projetu Swipe Safe (KPSS), Alexandre Pires Mendes hateten, iha inisiu halo ona parseria hamutuk ho Governu liuhusi Sekretariu Estadu Komunikasaun Sosial (SEKOMS) nune’e hodi kria website ChildFund nian, hodi ema hotu bele asesu informasaun servisu ChildFund nian.
“Objetivu prinsipal ne’ebé iha inisiu ami halo parseria hamutuk ho parte stack Holder ka Governu liuhusi SEKOMS iha ne’ebá ami hanoin ida oinsá mak atu kria ChildFund nia website rasik. Nune’e informasaun hotu ne’ebé liga atividade servisu ChildFund bele publika iha website refere hodi ema hotu-hotu bele asesu informasaun kona-ba servisu ChildFund nian.” Dehan Koordenador Projetu Swipe Safe, Alexandre Pires Mendes, ba jornalista iha Kolmera Tais Market Dili
Koordenador Projetu Swipe Safe hatutan, durante servisu hamutuk hetan apoiu husi Sekretariu Estadu Komunikasaun Sosial (SEKOMS) hanesan kria Jornal parede dijital iha eskola hanesan Channel ida, bainhira materia ida ligasaun protesaun labarik sira iha Online nian ema hotu bele asesu liuhusi ChildFund nia website rasik. Aleinde ne’e iha akordu (SEKOMS) nian hodi promove protesaun labarik iha meiu online nomos iha eskola sira
“Website ne’ebé ami kria atu publika informasaun oioin liga ho programa ChildFund nian, ha’u hanesan Koordenador Projetu ami iha programa barak hanesan Seguransa online, protesaun labarik sira nune’e bele proteje labarik sira iha saude, edukasaun, nomos online ninian, ida ne’e mak programa espesifiku ChildFund.” Hatutan Koordenador Projetu Swipe Safe
Koordenador informa, servisu ne’ebé durante ne’e hala’o maka ChildFund hetan apoiu makas husi SEKOMS liu-liu kria jornal parede dijital iha eskola sira hanesan Channel ida, nune’e oinsá materia ida iha ligasaun ba protesaun labarik iha area online nian.
Iha fatin hanesan Xefe Departementu IT SEKOMS, Sandra De Jesus Brites haktuir, nu’udar responsavel IT SEKOMS hodi fó apoiu tekniku dezenvolvimentu Website ba ChildFund Timor-Leste, to’o faze lansamentu Website, tanba iha ona koopersaun entre SEKOMS ho ChildFund Timor-Leste iha tinan kotuk 2025.
“Ami Departamentu IT-SEKOMS nian responsavel ba apoiu prosesu tékniku tomak dezenvolvimentu Website ChildFund Timor-Leste, husi planeamentu estruturál no dezeñu interfasia website nian to’o faze lansamentu. Ami nia objetivu prinsipál atu suporta no hametin kooperasaun entre SEKOMS no ChildFund Timor-Leste bazeia ba akordu ka Nota Entedimentu (MoU) ne’ebé asina husi Sekretáriu Estadu Komunikasaun Sosial, Expedito Loro Dias Ximenes no ChildFund Timor-Leste. Alzira dos Reis nu’udár Diretora CFTL, iha fulan Abril Tinan 2025.” Dehan Xefe Departementu IT SEKOMS, Sandra De Jesus Brites
Xefe Departamentu hatutan, asina akordu entre Governu liuhusi SEKOMS no ChildFund Timor-Leste atu servisu hamutuk hodi promove literásia dijital, hodi permite ba públiku, parseiru sira nomos doadór sira hotu hodi asesu informasaun kona-ba programa labarik nian no atividade sosiál sira, nune’e fásil liu no transparente liután.
Esplika liután ChildFund Timor-Leste servisu hamutuk ho Sekretáriu Estadu Komunikasaun Sosiál SEKOMS ne’ebé instala Website ba ChildFund, nune’e fasilita labarik sira no bele proteje labarik sira liuhusi materia online. Aleinde ne’e mós fasil ba ema hotu-hotu bele asesu programa no atividade ne’ebé ChildFund Timor-Leste halo liuhusi Website ne’e rasik.
Reportajen : Nelfiano
Foto : Nelfiano