Dili, 30 Jullu 2025 (Média Democracia) – Komandu Polísia Nasional Timor-Leste (PNTL) liuhusi Diresaun Servisu Investigasaun Kriminal Nasional (DSIKN) iha loron 24 fulan Jullu tinan 2025 DSIKN halo operasaun iha area Bairo-Pite tanba iha informasaun katak fatin ne’eba fasilita Esplorasaun Seksuál ka Prostituisaun. Konferensia ne’e Média Democracia asesu liuhusi pajina PNTL, Kuarta semana ne’e.
Porta-voz Komandu PNTL Superintendente Polísia João Belo dos Reis hateten liuhusi konferensia imprensa ne’e relata hafoin hetan tiha informasaun nune’e DSIKN halo kedas operasaun no konsege identifika lezadu na’in hitu (7), sasin ida no suspeitu na’in ida.
“Relasiona ho kazu ne’e iha loron 27 Fulan Jullu tinan 2025 aprezenta ba Tribunal no suspeitu hetan Prizaun Preventiva, tanba ne’e ami hanesan Autoridade Seguransa husu ba sidadaun hotu-hotu atu bele halo keixa ba grupu balun ne’ebé halo hela atividade explorasaun seksual iha Munisípiu, tantu iha fatin ne’ebé de’it.” Dehan Porta-voz Komandu PNTL, João Belo dos Reis
Superintendente hatutan, Polísia Nasionál Timor-Leste (PNTL) halo preparasaun imediata tanba bele fó impaktu ba ema nia vida liul-liu ba joven sira hotu liuhusi hala’o operasaun ba fatin ne’ebé deskonfia halo atividade livre hodi fó impaktu ba ema seluk nia moris.
“Servisu Nasionál Inteligensia (SNI) kontinua halo patrullamentu maka’as bainhira identifika mak Autoridade Seguransa (PNTL) sei la tolera sidadaun sira ne’ebé halo atividade explorasaun seksual ne’e, ami nia operasaun la’o hela atu buka tu’ir no identifika ba fatin-fatin ne’ebé halo explorasaun seksual.” Haktuir Komandu PNTL, João Belo dos Reis
Aktual Diretúr DSIKN ne’e salienta tan katak tanba atividade ne’e kontra lei no oinsá sidadaun sira bele hado’ok-an husi moras HIV-SIDA, tanba moras ne’e fasil atu hada’et ba ema seluk liu-liu joven sira nia vida, nune’e husu ba sidadaun hotu tenke kuidadu-aan no prevene husi seksu livre.
Esplika liután Komandu Polisia Nasional Timor-Leste PNTL, liuhusi Diresaun Servisu Investigasaun Kriminal Nasional (DSIKN) iha loron 24 Fulan Jullu 2025 hala’o atividade operasaun ba fatin Explorasaun Seksuál iha Bairo-pite detein lezadu na’in hitu. Haree ba atividade explorasaun seksual ne’e bele fó impaktu ba ema seluk nia vida liu-liu ba joven, tanba joven sira hanesan jerasaun kontinuador ba nasaun ida ne’e nomos husu ba sidadaun hotu tenke prevene-aan husi virus HIV-SIDA iha rai laran.
Reportajen : Nelfiano
Foto : Média PNTL