Dili, 10 Jullu 2025 (Média Democracia) – Eis Konsuladu Sydney hamutuk ho defensor realiza komunikadu imprensa hodi fó apresiasaun ba Tribunál Rekursu kona-ba kazu entre Eis Konsulada Ministra Negósiu Estranjeiru. Komunikadu ne’e hala’o iha Gloria Jeans Kolmera Dili, Tersa semana ne’e
Mandatariu Luciano Valenti, Defensór Sergio Quintas hateten, Tribunál Rekursu hatún ona akordaun hodi deside Estadu Timor-Leste liuhusi Ministeriu Negósiu Estrajeiru Kooperasaun (MNEK) mantein hodi selu indemnizaun sivil ba Eis Konsúladu Timor-Leste ba Austrália ne’ebé rezidente iha Sidney Luciano Valentim Conceição ho valór osan $9.500 tanba manán keixa kontra Eis-Ministra Negósiu Estrajeiru no Kooperasaun (MNEK) Adaljiza Magno ba kazu asaun deklarativa indeminizasaun faktu ílisitu iha 2021.
“Ha’u hanesan mandatariu Señor Luciano nian Tribunál notifika horseik no iha desizaun ne’e konta katak tranzitada Eis-julgada tiha ona ne’ebé Estadu hanesan iha prosesu tenke kumpri ona desizaun hodi selu indeminizaun ba señor Luciano nu’udar autor ba prosesu ne’e ho valór $9.500.” Dehan Defensór Sergio Quintas
Nia hatutan hanesan mandatariu husi Luciano Valentim Tribunál notifika iha segunda-feira (07/07/2025) horseik hodi hateten desizaun Tribunal Rekusu mantein desizaun interiór Tribunál Judisiál Primeira Instansia Dili (TJPID) nian katak Ministeriu Públiku ne’ebé reprezenta Estadu Timor-Leste ba keixa Eis Ministra Adaljiza Magno ba kazu asaun deklarativa de indeminizasaun por faktu ílisitu iha 2021 lakon iha prosesu, nune’e Estadu TL iha obrigasaun tenke selu indeminizasaun ba Luciano Valentim Conceicão ho naran kodiku “Timor Maubere” ho valór $9.500.
“Tribunál Judisial Primeira Instansia Dili (TJPID) liuhusi desizaun katak Estadu iha obrigasaun atu selu indeminizasaun ba Eis Konsúl Timor-Leste nian ba Sidney Luciano Maubere, tanba faktu la provadu nia mak troka konta bankaria Konsúl Jerál Sidney iha Austrália, tanba ne’e Estadu iha obrigasaun tenke halo indeminizasaun ba Luciano ho valór $9.500, maibé momentu ne’ebá Prokuradór ne’ebé reprezenta Estadu iha prosesu ne’e nu’udar rekore desizaun ne’e ba Tribunál rekursu hodi kontesta desizaun Tribunal Judisiál Primeira Instansia Dili no Tribunál Rekursu hatún desizaun mantein desizaun interiór Tribunál Judisiál Primeira Instansia Dili nian ba prosesu refere.” Hatutan Defensór Sergio Quintas
Nia informa, Estadu liuhusi Ministeriu Negósiu Estrajeiru no Kooperasaun (MNEK) tenke selu indeminizasaun ba Eis Konsúl Jerál Sidney ba Timor -Leste Luciano Valentim Conceicão “Timor Maubere” ho osan valór 9.500.
Nia haktuir kuandu Estadu la selu nia kliente tuir saida mak desizaun Tribunál nian, hanesan mandatariu sei hatama fali prosesu ida ho naran títulu ezekutivu tuir artigu 766 no 768 husi Kódigu Prosesu Sivil ba Tribunál hodi haruka polísia ba Edifisiu MNEK hodi halo ezekusaun ba prosesu indeminizasaun ida ne’e.
Iha fatin hanesan, Luciano Valentim Conceicão hateten, nia apresia ho desizaun Tribunál Rekursu nian ba nia kazu refere buat hotu lao tui lei hodi define lolos kona-ba preblema ne’ebé hasoru iha Austrália Sidney.
“Ha’u agradese ba ita-nian Trubunál ba ita nian seitór justisa ho desizaun ne’ebé halo ona, ida ne’e mak desizaun no desizaun ne’e adekuadu.” Dehan Luciano Valentim Conceicão
Nia hatutan, hanesan vitima ba kazu refere iha oportunidade ida ne’e hakarak agradese ba setor justisa, Tribunal Dili no Ministeriu Publiku liu-liu ba Juiz sira, tanba halo sira-nia kna’ar profisional parsialidade no dignidade ohin loron bele hetan justisa.
Esplika liután hanesan mandatariu husu ba Estadu hanesan Reo iha prosesu ne’e atu hatudu boa fé hodi halo indeminizasaun ba nia kliente ne’ebé nu’udar autor ba prosesu, nune’e labele halo tan asaun ezekutivu ida refere.
Reportajen : Nelfiano
Foto : Nelfiano