Família Palomita Gusmão Husu Autoridade Garante Justisa no Transparénsia ba Kazu Omesídiu

Dili, 20 Novembru 2026 (Média Democracia) – Família matebian Palomita Gusmão Guterres, liuhusi reprezentante Miguel Godinho Martins, husu ba autoridade kompetente, liuliu instituisaun seguransa no tribunál, atu garante prosesu investigasaun no justisa ne’ebé independente, justu no transparente, hodi responsabiliza suspeitu tuir lei kona-ba kazu omesídiu ne’ebé rezulta vítima lakon nia vida.

Ezijénsia ne’e hato’o husi Miguel Godinho Martins iha konferénsia imprensa ne’ebé realiza iha rezidénsia matebian nian, iha Matadoru, Kinta-feira (19/11).

Palomita Gusmão Guterres lakon vida iha akontesimentu violénsia ne’ebé akontese iha Tasi-Tolu, Díli, iha Kuarta-feira, 18 Novembru 2026, ho suspeita envolve nia namoradu.

Miguel Godinho Martins afirma, família hakarak atu justisa sai prioridade prinsipál iha prosesu kazu ne’e. Família mós husu ba autoridade kompetente atu fó informasaun ne’ebé klaru no transparente kona-ba dezenvolvimentu investigasaun.

“Família nia deklarasaun mak justisa tenke tau aas liu buat hotu. Família mós husu ba autoridade kompetente atu fó informasaun ne’ebé transparente no kle’an kona-ba prosesu kazu ne’e. Família nia hakarak mak atu situasaun hanesan ne’e labele kontinua akontese tan ba jerasaun tuirmai,” dehan Miguel Godinho Martins ba jornalista sira.

Reprezentante família ne’e esplika, durante nia moris, Palomita Gusmão Guterres nu’udar ema ne’ebé hadomi família, la iha problema ho ema seluk no moris di’ak ho komunidade. Nia atividade loroloron inklui partisipa iha atividade igreja no kontinua fó atensaun ba nia estudu.

Nia mós lamenta tebes akontesimentu ne’e, tanba to’o agora família seidauk konsege simu realidade triste ne’ebé akontese ba sira-nia membru família.

Tanba ne’e, representante família husu atu justisa la bele halo diskriminasaun bazeia ba diferensa kor, kondisaun ekonómika ka pozisaun sosial, maibé tenke hala’o prosesu tuir lei ne’ebé vigora iha Timor-Leste.

Nia afirma, to’o agora família matebian Palomita Gusmão Guterres seidauk halo komunikasaun ho família suspeitu nian, tanba família foka liu ba prosesu investigasaun no justisa ne’ebé autoridade relevante sei hala’o tuir lei.

Iha parte seluk, autoridade lokál João do Rego mós kondena hahalok violénsia hasoru feto no labarik, no husu atu prosesu justisa ba kazu ne’e kontinua tuir lei.

João do Rego hateten katak, maski família no komunidade seidauk konsege simu realidade triste ne’e, sira tenke entrega kazu ba autoridade kompetente atu hala’o investigasaun no prosesu judisiál tuir lei.

“Nu’udar autoridade lokál, ha’u la simu hahalok ne’ebé la di’ak hasoru ita-nia oan sira. Justisa tenke la’o, tanba lei mak regula,” nia afirma.

João  mós subliña  prosesu justisa tenke hala’o tuir lei, no komunidade labele uza vingansa nu’udar solusaun ba kazu ne’e.

Reportajen: Octaviana da Costa

Foto: Octaviana da Costa

Tinggalkan Balasan

Alamat email Anda tidak akan dipublikasikan. Ruas yang wajib ditandai *