Dili, 21 Marsu 2025 (Média Democracia) – Institutu Nasionál Kombate HIV-SIDA (INCSIDA), servisu hamutuk ho Ministériu Saúde, Ministériu Koordenadór ba Asuntu Sosiais no Polísia Migrasaun kontinua sosializa informasaun ba estudante Universitáriu iha Timor-Leste kona-ba prevene transmisaun Virus HIV-SIDA.
Prezidente Institutu Nasionál Kombate HIV-SIDA Daniel Marçal hateten, atividade sensibilizasaun ida ne’e servisu hamutuk entre INCSIDA ho Ministru Koordenadór ba Asuntu Sosiais nomos Universidade da Paz inklui migrasaun, atu kapasita estudante sira hodi asegura sira-nia saúde ba future, tan ne’e joven tenke forte.
“Tanba sira nia hanoin sei fresku hela tanba frazilidade ne’e destroi joven sira hanoin no hahalok rasik, tanba ne’e mak ita fó hanoin ba sira katak sira tur iha banko eskola ne’e donator hirak mak investor ba sira, prinsipalmente inan aman, dosente sira ema barak kontribui ba sira nia futuru no sira la konsidera kontribuisaun sira ne’e.” Dehan Prezidente INCSIDA ba jornalista sira iha sexta ne’e
Prezidente ne’e dehan iha atividade refere atu fó ideia ba malu hodi alkansa estudante sira nia mehi ba futuru, tanba haree ba joven agora ladun kuidadu ba iha sira-nia saúde.
“Se ita la haree ita-nia joven sira la kuidadu-aan, ita labele kompete ho ASEAN lakleur tan ita tama ba ASEAN. Ema barak, liuliu joven sira ASEAN mai iha Timor, ita atu kompete ho sira oinsa ita hasae ita-nia joven nia koñesimentu no husu ba joven sira tenke badinas estuda, aliende ne’e mós joven tenke kuidadu sira-nia saude, atu nune’e ita nia nasaun mós sai forte liután.” Dehan nia
Prezidente ne’e haktuir katak, atu kompleta ka atinji vizaun governu nian mak prepara joven sira, fó hanoin no investe liafuan sira iha kualidade, bele motiva sira hodi hamrik husi sira-nia kostume ne’ebé sira lahatene atu destroi dadauk.
Joven barak nia futuru ladi’ak tanba kostume ne’ebé la diak, presiza hadia kostume ne’ebé iha sira-nia isin atu nune’e bele la’o ba oin hodi kompete ho ema ASEAN.
Nia dehan INCSIDA nia planu ba oin sei nafatin sosializa informasaun ba joven, estudante sira hahu ona husi Universidade ICS, UNPAZ no se ba Universidade sira seluk no ba to’o komunidade sira iha Munisipiu, tanba HIV-SIDA ne’e problema nasional ema hotu presiza hetan imformasaun.
Iha biban ne’e reprezentante Ministru Koordenadór ba Asuntu Sosiais Florindo da Silva Vicente agradese tanba Timor-Leste iha ona instituisaun ida ne’ebé foka liu atu muda mentalidade no konsiénsia individuál ba prevensaun moras HIV-SIDA.
“Ha’u espera katak Timor-Leste liuhusi governu atu investe barak liután ba iha INCSIDA, liuhusi fatin ida ne’e duni mak atu hato’o informasaun ba komunidade no povu Timor-Leste nune’e bele muda ona ita-nia mentalidade komunidade sira kona-ba oinsá atu prevene-an husi moras daet sira.” Dehan reprezentante MCAS
Nia husu ba Universidade hotu iha Timor-Leste ne’ebé iha área Fakuldade saúde atu servisu hamutuk, nune’e bele lori informasaun ba komunidade sira hodi bele muda sira-nia mentalidade.
“Dezenvolvimentu seitór saúde ida mak atu muda mentalidade komunidade sira, nune’e bele hadook-an husi moras hadaet, liuliu moras HIV-SIDA tanba moras HIV-SIDA ne’e perigozu tebes no ita-nia aimoruk hodi halo kurativu laiha so bele halo prevensaun de’it ne’e mak HRV ne’e, agora se ita la muda atitude hahalok moris komunidade maka ita sei hasai osan barak ba kompras medikamentu ikus mai ita-nia osan la to’o moras barak hela de’it depois ikus mai ita atu tau sala ba sé.” Nia haktuir
Reprezentante Ministru ne’e husu ba governu atu labele iha dúvida hodi investe osan ba instituisaun hirak ne’ebé nia servisu liga ho saúde ema nian, tanba sira-nia servisu ne’e importante tebes, se ita konsege halo ona promosaun prevensaun kona-ba muda atitude moris komunidade nian maka orsamentu kona-ba kompras medikamentu ne’e sei oitoan, tanba moras laiha komunidae komesa sadar ona ka iha konsiénsia ona.
Iha biban ne’e reprezentante dekanu fakuldade siensia saude UNPAZ, Xefe departamentu Epidemolojia, saúde públika, Mariana Freitas agradese ba INCSIDA tanba liuhusi sensibilizasaun ba estudante sira ne’e hanesan aumenta koñesimentu iha área universidade nian, liuliu ba fakuldade saúde públika no siénsia médika, tanba iha lisaun balun ne’ebé koalia mós kona-ba moras hadaet no moras la hadaet.
Nia dehan liuhusi informasaun ne’ebé dezamina ba estudante sira ne’e bele haforsa estudante sira hodi prepara materia ba iha peskiza, oinsá sira buka kle’an liután kona-ba problema saúde ne’ebé agora dadauk espalla, liuliu ba moras HIV-SIDA, tanba kazu ida ne’e risku liubá joven sira.
Entretantu iha atividade ne’e partisipa husi Estudante Universidade da Paz hamutuk 250 husi Fakuldade Saude Públika no Siénsia Médika ne’ebé hamutuk nia departamemtu 7 hanesan, Administrasaun Jestaun Politika Saude, Departamentu Saude Ambiental, Departamentu Siensia Nutrisaun, Deoartamentu Saude Reprodutiva, Deoaetamentu Siensia Epidemolojia, Departamentu Bio Estatistika No Departamentu Enfarmajen.
Reportajen : Estefania
Foto : Estefania