Dili, 21 Outobru 2024 (Media Democracia) Ivonia Soares, ho idade (19) husi Munisipiu Bobonaru daudaun ne’e hela iha Tasi-tolu bairo Karantina, hakotu nia estudu tanba hakarak buka moris iha Dili liuhusi kria negósiu ki’ik fa’an sigaru iha trotoar leten hetan osan hodi sustenta ba familia
Tuir negósiante Ivonia Soares hateten, durante tinan-tolu nia laran ona moris kria atividade negosiu ki’ik hanesan fa’an sigaru iha trotoar leten nune’e bele hetan osan ituan hodi sustenta ba nesesidade loron-loron nian no balun haruka ba familia sira iha munisípiu
“Osan ne’ebé ha’u uza lori halo negósiu ne’e iha tinan 2021 ha’u nia avo feto simu osan terseria idade nian iha momentu ne’ebá fó osan 100 dolar mai ha’u maibé lahatene loos osan lori halo saida mak di’ak entaun tur hanoin no foti desizaun ho prima mai Dili, hodi hola sigaru atu halo negósiu, entau iha momentu ne’e kedas too iha Dili liu semana ida ha’u lori osan ne’e ba hola sigaru LA falun rua iha loja xineza, komesa fa’an iha estrada ninin hodi buka osan.” Dehan Ivonia Soares
Nia hatutan tan katak sigaru ne’ebé nia fa’an kada loron ema sosa husi dadersan too lorokraik sempre hetan osan $20 dolar, karik iha tempu di’ak dalaruma bele hetan too $30 dolar liu tanba fa’an husi tuku hitu dader too fali tuku neen lorokraik
“Osan ne’ebé durante ne’e ha’u hetan balun lori uza ba ha’u nia presiza loron-loron nian no balun lori selu Uma/kos, maibé barak liu lori hola foos no sasan sira seluk sempre haruka ba avo sira iha munisipiu. Maske ha’u hetan osan ne’ebé naton maibé ha’u sempre agradese ba maromak maske la barak maibé susutenta ona ba mai nia presiza.” Dehan nia
Nia salienta liután maske ema barak mak lori sasan mai fa’an iha estrada ninin maibé nafatin esforsu aan hodi kompete ho ema seluk tanba hakarak hetan osan tenke uza tempu ho didiak bele hetan osan sustenta ba presiza nian nune’e labele tane liman ba ema seluk.
Esplika kle’an liután katak Ivonia mai husi Munisípiu Bobonaru ho intensaun hakarak halo negósiu bele sustenta ba nia presiza no haree moos ba familia sira iha munisípiu. Maske durante ne’e fa’an sigaru iha loron manas nian laran no hetan dezafiu oinoin maibé ida ne’e la sai problema hodi hapara nia atividade negósiu.
Reportajen : Nelfiano
Foto : Nelfiano