Dili, 17 Setembru 2025 (Média Democracia) – JSMP realiza komunikadu imprénsa husu ba Prezidente Repúblika ejize entidade estadu tomak transforma independénsia nasionál ba dezenvolvimentu sustentável iha abertura sesaun Lejislativa datoluk lejizlatura da-neen Parlamentu Nasionál, nune’e JSMP enkoraja Prezidente promove solusaun ba ezijénsia publiku nian. Komunikadu ne’e Média Democracia asesu husi pajina JSMP Kuarta semana ne’e.
Diretora Ezekutiva JSMP Ana Paula Marçal hateten, Parlamentu Nasionál realiza serimónia abertura ba sesaun lejizlativa iha Lejislatura Da-neen através plenária ordinária, ne’ebé prezidi husi Prezidente PN, distinta Deputada Maria Fernanda Lay ho prezensa Exelénsia Prezidente Repúblika Demokrátika Timor-Leste, governante sira, entidade públiku sira Estadu nian no korpu-diplomátiku sira.
“Plenária ne’e hahú ho intervensaun no deklarasaun polítika husi Bankada Parlamentár sira husi Bankada CNRT, PD, FRETILIN, KHUNTO no PLP, diskursu Prezidente Parlamentu Nasionál no ensera ho mensajen no diskursu Estadu husi Exelénsia Prezidente Repúblika, José Ramos Horta.” Dehan Diretora Ezekutiva JSMP, Ana Paula Marçal
Diretora Ezekutiva hatutan, iha Prezidente Repúblika ninia diskursu subliña prátika di’ak sira kona-ba polítika administrativa, servisu operasionál no finanseira ne’ebé introdús iha interna Prezidénsia Repúblika hamutuk ho inisiativa sira seluk kona-ba programa “dapur ba povu, abitasaun sosiál no asaun sosiál, programa hakbiit feto, klínika ba povu, palásiu abertu no seluk tan.
Aleinde ne’e, Prezidente-Repúblika mós hateten, ezijénsia atu transforma independénsia nasionál ba dezenvolvimentu sustentável no promove oportunidade hanesan no justisa sosiál ba sidadaun Timor-oan hotu-hotu, hodi fó onra ba sakrifísiu husi sira ne’ebé dedika sira-nia vida ba liberdade no independénsia totál.
“JSMP fiar katak Prezidente Repúblika iha poder konstituisional planea atu ezije entidade Estadu tomak hodi halo mudansa no transforma vizaun Estadu ba interese komum no asegura ben-estar ba povu tomak laos ben-estar politiku sira.” Dehan Diretora Ezekutiva JSMP
Diretora afirma, iha realidade, JSMP rejista polítika públiku sira ne’ebé Deputadu sira, membru governu inklui Prezidente Repúblika rasik dalabarak lakon kapasidade institusionál, konsiénsia sosiál no sentidu responsabilidade atu reflete no hatan ba realidade sosiál-ekonómika povu nian.
“Iha kazu atuál, protestu no reazen to’o manifestasaun ne’ebé estudante sira lidera nu’udar forma ida husi krítika públiku ba komportamentu polítiku ukun na’in sira ne’ebé projeta lei ba benefísia de’it sira-nia interese pesoál no partidária.” Afirma Diretora JSMP
Diretora informa, lista naruk kona-ba subsídiu no regalias ezajeradu ba Deputadu/a Parlamentu Nasionál ne’ebé kauza protesta husi nível sosiedade tomak, tuir loloos tenke sai tema sentrál iha diskursu Estadu husi Prezidente Repúbliku nu’udar aktu no jestu krítiku Prezidente ba Deputadu sira, la’ós halo de’it diskursu retórika serimoniál de’it.
“Husu ba Prezidente-Repúblika tenke sensível, alertadu no hatudu empatia ho lian públiku ne’ebé durante tinan barak halerik kontra lideransa insitituisaun Estadu sira ne’ebé viola sira-nia devér institusionál atu fornese no asegura moris di’ak ba povu.” Infroma Diretora Ezekutiva JSMP, Ana Paula Marçal
Nia subliña, iha situasaun sira hanesan dadaun estudante no sosiedade sivil tun ba dalan hodi protesta subsídiu no regalias oioin husi órgaun lejislativu, Deputadu/a sira ne’ebé tuir lei no Konstituisaun reprezenta povu, ezije solusaun real husi lideransa Estadu sira, partikularmente Prezidente-Repúblika, la’ós mensajen kamuflase, desviu no ignoránsia.
Esplika liután iha komunikadu imprénsa ne’e JSMP ezije ba Prezidente Repúblika atu ezerse ninia kompeténsia hodi enkoraja solusaun entre órgaun soberanu sira, envesde halo diskursu serimoniál ne’ebé laiha sentidu tanba lakon kapasidade atu fó solusaun ba problema real ne’ebé povu atravesa hela.
Reportajen : Nelfiano
Foto : Média JSMP