Dili, 21 Maiu 2025 (Media Democracia) – Komandu Polísia Nasional Timor-Leste (PNTL) liu husi Komandante Jerál PNTL Komisariu Jeral Polísia Henrique da Costa hasai ona despaixu ba Komandu Unidade Espesial Polísia (UEP) no Diresaun Investigasaun Kriminal Nasional (DIKN) hamutuk ho Komandu PNTL Munisipiu Bobonaro hodi forma ekipa, nune’e inisia Prosesu Investigasaun ba kazu ne’ebé akontese iha Postu-Administrativu Cailaco, munisipiu Bobonaro iha loron 20 fulan Maiu tinann 2025.
Iha introdusaun konfrontu ne’e akontese bainhira serimonia Isar Bandeira ba Komemorasaun Loron Restaurasaun Independensia Timor-Leste ba dala 23 lao hela iha Kampu Futebol Cailaco iha oras 11 hodi rezulta sidadaun joven ida lakon vida.
Porta-Voz Komandu PNTL Superintendente Polísia João Belo dos Reis liuhusi Konferensia Imprensa ne’e esplika liga ba kazu ne’ebé viral iha Media Sosial, atu informa katak PNTL simu relatoriu husi Komandu PNTL Munisipiu Bobonaro horseik (20/05) hafoin akontesimentu, iha relatoriu mensiona katak kazu ne’e akontese mais ou menus iha oras 11 bainhira serimonia Isar Bandeira iha Administrasaun Postu nian lao hela.
“Tuir informasaun ne’ebé ita hetan mós katak, joven sira ne’e mai husi Grupu Arte Marsiais (GAM) rua ne’ebé iha kalan ne’e kedas (19/05) tenta atu asalta malu, sira tuda mós veterenus ida nia uma tuir informasaun ne’ebé ita simu, iha veternaus nia uma ne’e tau hela mós bandeira iha ne’ebá, husi atuasaun sira ne’ebé ita halo, hafoin sira (GAM-rua) ne’e tuda malu mai to’o fatin serimonia nian, Polísia halo intervensaun.” Informa Porta-Voz Komandu PNTL ne’e
Superintendente Polísia ne’e salienta tan ikus informasaun ne’ebé PNTL hetan katak joven ida hetan kanek grave no bainhira halo transportasaun ba Ospital la konsege salva nia vida. Husi atuasaun no informasaun sira ne’ebé iha, primeiru maka Orientasaun Komandante Jerál nian tau kedas ekipa ida husi UEP hodi ba apoiu kedas iha fatin akontesimentu.
“Segundu, orienta mós ekipa husi DIKN ba iha ne’ebá (Fatin Akontesimentu) hodi bele buka tuir saida maka akontese iha ne’ebá hodi suporta investigasaun Komandu Munisipiu Bobonaro, ita mós halo kedas pedidu Autopsia hodi transporta mai iha Dili hodi halo Autopsia ba mate isin ne’ebe iha.” Hatutan Superintendente Polísia João Belo dos Reis
Diretúr DIKN ne’e afirma informasaun ne’ebé viral katak mate ne’e kauza husi kilat musan ka kauza husi membru PNTL nian tiru. Ida ne’e atu hato’o ba públiku, só rezultadu Autopsia maka bele hatene, mate ne’e mate ho kilat musan ka sasan kroat seluk. Husu atu labele halo persepsaun ida katak, ida ne’e tanba kilat musan maka tiru, sé atuasaun membru nian maka ema ruma hare’e katak membru tiru ou kanek ne’e tanba kilat musan, prosesu sei lao, prosesu krime no prosesu disiplinar sei lao.
Maibé karik ne’e tanba ema ruma maka oho ho sasan kroat ne’e mós, investigasaun sei lao no ema ne’e tenke responsabiliza ba atuasaun ne’ebe nia halo, relatoriu ami simu ona, maibé ami hateten iha ne’e katak buat hotu-hotu investigasaun maka sei termina bazea ba deklarasaun husi sasin sira, ema sira ne’e hare’e, rona, maka ita bele aprezenta ba Tribunal, tuir informasaun ne’ebé hato’o mai katak membru PNTL na’in rua ne’e tiru maibé dala ida tan investigasaun sei determina, karik atuasaun ne’ebé sira halo tuir prosedimentu kalae, ne’e sei to’o investigasaun maka sei termnina.
Reportajen : Media PNTL
Foto : Pajina ofisial Lensa PNTL