Dili, 17 Juñu 2025 (Média Democracia) – Ministeriu Juventude Desportu Arte Kultura (MJDAC) liuhusi komisaun reguladora Arte Marsiais Kram hala’o komunikadu imprensa hodi relata ba publiku relasiona ho infrasaun sira ne’ebé kontinua komete husi membru arte marsiais nain haat iha munisipiu Aileu.
Prezidente Kram Octavio da Conceição hateten, konferensia imprensa ne’e Kram realiza atu relata ba iha Prezidente Arte Marsiais sira ne’ebé iha Timor laran tomak relasiona ho infrasaun ne’ebé komete husi membru arte marsiais balun hanesan membru organizasaun PSHT, KORKA, IKS, kontinua la obedese ba resolusaun governu ne’ebé iha nu 22/2025 dia 7 abril nu’udar resolusaun ida ne’ebé kontinua husi nu 45/2023 10 novembro nian katak nonu governu kontinua suspende pratika atividade arte marsiais iha teritoriu Timor laran tomak.
“Maibé ita haree iha realidade loron hirak ne’e no iha fulan ida ne’e nia laran Komandu Polisia Timor-Leste liuhusi operasaun konjuta sira ne’ebé hala’o sira nia kna’ar kontinua deteta no halo kapturasaun ba membru sira ne’ebé kontinua la kolabora ho ita-nia membru polisia sira no la obedese ba lei no resolusaun ne’ebé nonu governu fó sai ona.” Dehan Prezidente Kram Octavio da Conceição
Nia hatutan, iha sabadu foin lalais ne’e Komandu Polisia Nasional Timor Leste iha loron 7 juñu iha suku lahae Postu-Administrativu Daisoli Aileu Munisipiu Aileu Komandu PNTL Aileu hala’o pasa ravista ba joven sira ne’ebé atu halo viajen ba iha nossa señora Ramelau, Komandu PNTL ne’e halo kapturasaun ba iha joven nain neen ho motorizada no utiliza farda organizasaun PSHT nian no hatudu sira-nia atraisaun iha estrada laran “jurus” entaun iha ne’ebá polisia kaptura kedas sira.
“Horiseik Komandu PNTL Unidade Imigrasaun halo kapturasaun farda lubuk ida husi organizasaun IKS no PSHT ne’ebé farda sira haruka mai husi rai liur, entaun tama husi Aeroportu Internasional Komandu Unidade Polisia Imigrasaun hala’o kedas kapturasaun ne’e, ita konsidera ona katak membru sira ne’e la kumpri ba iha resolusaun ne’ebé iha ona, nune’e mós iha publisidade balun ne’ebé Kram asesu husi Media Sosial Facebook husi organizasaun KORKA iha loron hirak liubá sira abertamente katak la iha atividade husi membru organizasaun refere, maibé realidade hatudu katak membru organizasaun KORKA sira foto hodi halo publikasaun iha Media Sosial Facebook.” Hatutan Prezidente Kram Octavio da Conceição
Kram konsidera katak organizasaun arte marsiais sira la hatudu sira nia komportamentu di’ak no kooperasaun diak ho governu no Autoridade Suku sira, nomos iha publisidade balu hatudu husi estudante sekundariu balun hakerek organizasaun nia naran iha sira nia farda eskola nian. Ho asaun hirak ne’e Kram hakarak husu ba entidade liuliu ba iha dirijente eskola sira atu haree sira ninian estudante sira atu labele hala’o asaun provokator no hakerek naran organizasaun arte marsiais nian iha farda.
“Ita husu ba lideransa husi arte marsiais tolu nee atu kolabora di’ak ho autoridade seguransa liuliu iha Suku sira nomos Komandu Operasaun sira atu ita hotu servisu hamutuk hodi kumpri nafatin rezolusaun ne’ebé governu fó sai ona no ita hein to’o iha loron 31 dezembru tinan ida ne’e, bainhira governu deside atu reativa fali ka lae, nune’e ita sei halo tuir desizaun sira tuir mai.” Informa Prezidente Kram
Prezidente Kram iha mós publisidade balun ne’ebé Kram asesu iha media sosial iha arte ritual 77 halo publisidade, no Kram mós halo ona monitorizasaun ba iha Munusipiu Ainaru Postu Hatu-udo nian beikala ne’e sei iha nafatin organizasaun arte ritual 77 pinta iha moru lolon liuliu iha familia nia uma lolon sira, nune’e liuhusi monitorizasaun ne’e kram husu Autoridade Operasaun sira hamos tiha pintura sira.
Atu esplika kle’an liután katak liuhusi konferensia imprensa ne’e Prezidente Kram Octavio da Conceição husu ba iha jornalista sira atu ajuda trasmite informasaun ho los no klaru ba iha liderasa sira hotu liuliu ba iha lideransa arte marsiais sira, liuliu ba organizasaun arte marsiais sira ne’ebé ohin naran temi ona no kontra resolusaun ne’ebé fó sai ona husi Governu nian nu 22/2025 loron 7 fulan abril.
Reportajen : Domingas
Foto : Domingas