Dili, 17 Juñu 2025 (Média Democracia) – Prezidente Republika José Ramos-Horta, hahú hala’o vizita privadu ba nasaun Malázia husi loron 17 to’o 22 fulan juñu no vizita traballu ba nasaun Mónaku husi loron 23 to’o 25 fulan juñu 2025, hodi hametin Timor-Leste nia parseria internasionál sira no avansa kooperasaun rejionál.
Prezidente Ramos-Horta hateten nia vizita ba Kuala Lumpur foka liubá aprofunda relasaun bilaterál sira ho Malázia, parseiru xave ASEAN no apoiante ba tempu naruk Timor-Leste nian. Programa komprensivu inklui partisipasaun iha lansamentu livru Primeiru Ministru Anwar Ibrahim nian iha Salaun Tunku Abdul Rahman, demonstra relasaun bilaterál forte entre nasaun rua.
“Prezidente mós sei envolve ho Universidade Taylor liuhusi eventu akadémiku espesiál ida no almosu VIP, destaka oportunidade kooperasaun edukasionál ba estudante Timoroan sira no esplora parseiru iha edukasaun superior.” Dehan Prezidente Repúblika Ramos-Horta
Nia hatutan Vizita ida ne’e reforsa ligasaun istóriku entre Timor-Leste ho Malázia, harii iha Malázia nia apoiu krusiál durante Timor-Leste nia dalan ba independénsia no parseria kontinua iha inisiativa dezenvolvimentu rejionál sira.
“Hafoin vizitasaun remata iha malázia sei kontinua hala’o fali vizita traballu ba Mónaku hahú husi loron 23 to’o 25 fulan junu, subliña diplomasia multilaterál no envolvimentu juventude liuhusi atividade xave balu.” Hatutan Prezidente Ramos-Horta
Prezidente Horta sei halo enkontru ofisiál ho autoridade Monégasku sira no partisipa iha kompromisu diplomátiku sira ho nível aas. Pontu importante mak sesaun interativu ho estudante internasionál liu 40, promove diálogu kona-ba asuntu globál no fahe esperiénsia dezenvolvimentu úniku Timor-Leste nian.
Programa ne’e inklui almosu ho nivel aas ho distintu konvidadu na’in 20 no partisipa iha atividade sira husi Fundasaun Prínsepe Alberto II ne’ebé foka ba sustentabilidade ambientál no asaun klimátika.
Prezidente Ramos-Horta komenta kona-ba importánsia husi vizita sira-ne’e:
“Malázia sai hanesan belun ida ne’ebé metin mai Timor-Leste dezde ita-nia luta ba independénsia, no hametin ita-nia parseria iha família ASEAN nia laran. Iha Mónaku, ita envolve ho komunidade internasionál boot liu, hodi fahe ita-nia nasaun nia viajen enkuantu aprende husi prátika di’ak sira iha mundu. Vizita sira ne’e hatudu ita-nia kompromisu ba diplomasia ativa ne’ebé serve ita-nia povu nia aspirasaun ba dezenvolvimentu, edukasaun, no prosperidade sustentável.” Informa Prezidente Repúblika
Nia reafirma katak vizita sira ne’e mós subliña Prezidente Ramos-Horta nia esforsu kontinua atu diversifika parseria internasionál Timor-Leste nian no asesu oportunidade foun iha edukasaun, kuidadu saúde, no dezenvolvimentu sustentável. Prezidente Ramos-Horta tuir planu sei fila hikas mai Timor-Leste iha loron 27 fulan juñu tinan 2025.
Reportajen : Domingas
Foto : Media Officer PR