Dili, 29 Agostu 2026 (Media Democracia) – Arif Abdullah Sagran rekoñese sala no hato’o deskulpa ba povu Timor-Leste no herói sira, kona-ba liafuan ne’ebé nia publika liuhosi media sosial ho konteúdu “Timor-Leste Tiba-tiba Merdeka”, ne’ebé hamosu reasaun no preokupasaun iha públiku. Efeitu husi publikasaun ne’e, komunidade no grupu joven sira halo asaun hasoru nia iha madrugada, daderan loron 29 Agostu 2026.
Arif Abdullah Sagran hato’o deklarasaun liuhosi komunikadu imprensa, hodi husu deskulpa no haraik an ba povu Timor-Leste, liuliu ba herói sira ne’ebé sakrifika sira-nia moris no fo-an ba rai ida-ne’e, hodi luta ba Timor-Leste nia independénsia.
“Hau Arif Abdullah Sagran, hau mai iha fatin ne’e bolu ita boot sira atu hato’o hau nia sensiru pedidu deskulpa ba hau nia liafuan ne’ebé mak sai iha media sosial relasiona ho intervista ne’ebé hau halo iha fulan balun liu ba kotuk ne’e, hau rekoñese katak liafuan ne’ebé maka hau koalia sai sala no hau rekoñese liafuan ne’ebé kria ofense ba povu no nasaun Timor-Leste” dehan Arif Abdullah Sagran iha nia residensia Markoni Dili
Alende ne’e nia klarifika ba publiku katak liafuan ne’e laos ho intensaun, tanba ne’e husu deskulpa ba povu Timor-Leste tomak no luta nain sira inklui mos ba familia martires luta nain
“hau hakarak klarifika katak laos hau nia intensaun halo hanoin. Ba povu tomak nasaun Timor-Leste mak hau hadomi hau husu deskulpa ba povu Timor-Leste tomak ba luta nain sira hotu no mos ba familia saudozu luta nain sira hotu hau husu deskulpa ba nasaun Timor-Leste tomak ba dala ida tan hau Arif Abdullah Sagran” nia klàrifika
Reportajen : Media Democracia