Dili, 29 Setembru 2025 (Média Democracia) – Ministeriu Edukasaun hamutuk hamutuk ho Igreja Katolika Timor-Leste realiza atividade hodi halo lansamentu ofisial ba manual alunu nian 8⁰ nomos 11⁰ anu, kona materia Edukasaun no Relijiaun Moral, iha Salaun ISFIT Fatumea, lansamentu ne’e Media Democracia asesu husi pajina Ministeriu Edukasaun, Sesta Semana kotuk, 26/09/2025.
Ministra Edukasaun Dulce de Jesus Soares, iha diskursu hatete onra no sentidu responsabilidade boot ne’ebé hasoru iha okaziaun importante ida-ne’e mak lansamentu ofisiál Manuál Alunu ba 8.º no 11.º anu. Dixiplina Edukasaun no Relijiaun Morál hala’o papél fundamentál ida iha formasaun labarik no joven Timoroan hotu ajuda sira atu komprende di’ak liutamán signifikasaun moris nian, importánsia dignidade umana, justisa, solidariedade no respeitu.
“Manuál hirak-ne’e halo riku profesór sira-nia servisu atu fó apoiu estruturadu no atualizadu ba sira, enkuantu oferese matadalan aprendizajen ida-ne’ebé klaru, asesível no konsistente ba estudante sira ho ita-nia identidade kulturál no espirituál, ezemplu ida kona-ba oinsá kolaborasaun entre Estadu, Igreja no sosiedade bele fó rezultadu ba nafatin hodi harii futuru ida-ne’ebé justu no umanu.” Dehan Ministra Edukasaun Dulce de Jesus Soares
Ministra Edukasaun hatutan Edukasaun iha Timor-Leste tenke inkluzivu, kualidade no promove valór sira ne’ebé hametin sidadania, pás no unidade nasionál. Manuál sira-ne’e laos de’it livru eskola, maibé parseiru moris nian, instrumentu ida-ne’ebé ajuda atu sai ema integradu, responsavel no kompromitidu. Tanba ne’e kompromisu Ministériu Edukasaun nian atu kontinua apoia inisiativa hirak-ne’e, hadia sistema edukasaun sai riku no kontribui ba formasaun sidadaun Timoroan hotu.
Iha fatin hanesan, Prezidente Ezekutivu Comissão Nacional da Educação Católica de Timor-Leste (CONECTIL), Rev, Pe. António Quenser, hateten Edukasaun Morál no Relijiaun Katólika hola papél fundamentál iha edukasaun karakter umana no relijioza, inklui hola papél fundamentál iha konstrusaun valór iha indivídu no sosiedade Timorense.
“Edukasaun Morál no Relijiaun orienta indivídu no sosiedade ba buat ne’ebé loos no sala, promove étika, empatia no respeitu ba ema seluk, hodi kuda mós baze espirituál ba fiar nian. Relijiaun hamorin importánsia husi valór domin iha kompaixaun no perdaun ne’ebé aprende liuhusi doutrina, istória, ritual no interasaun sosiál iha eskola nomos ambiente relijiozu sira.” Dehan Rev, Pe. António Quenser.
Prezidente Ezekutivu CONECTIL hatutan, ohin lansamentu manuál ba alunu 8⁰ no 11⁰ anu, ida ne’e hanesan rekursu didátiku ba siklu da-lll ensinu báziku no ensinu sekundáriu nian no ida ne’ebé sai hanesan TPC ba CONECTIL mak rekursu didátiku ba ensinu pré-eskolar no ensinu báziku siklu ida no da-ll ne’ebé tuir planu sei hahú revizaun iha tinan oin.
CONECTIL hanesan orgaun ezekutivu ida husi Konferénsia Episkopál Timorense, ne’ebé hola responsabilidade husi 2005 ho naran Komisaun Katekétika Interdiosezana hafoin muda ba Sinerse no iha 2013 nakfilak ba CONECTIL hodi servisu maka’as no estabelese kurríkulu ida hodi hanorin no forma Timoroan sira, hahú kedas ho programa kurrikulár gia profesór no manuál alunu, inklui materiál didátiku.
Esplika liután realizasaun ba atividade lansamentu ne’e kona-ba manuál do alunu husi 8⁰ to’o 11⁰ liuhusi disiplina Edukasaun no Relijiaun Morál, nune’e partisipa husi Ministra Edukasaun hamutuk ho Relijiaun Katólika Timor-Leste
Reportajen : Nelfiano
Foto : Media ME