Dili, 08 Agostu 2025 (Média Democracia) – Iha entrevista ho Ministeriu Interior Francisco Guterres husu média sira atu akompañia rekrutamentu kandidatura foun Polisia Nasional Timor Lorosa’e PNTL tinan 2025 iha Timor-Leste.
“Média sira ajuda ami para ba haree ba rekrutamentu ajente Polísia Nasionál Timor-Leste (PNTL) nune’e dokumentus ne’e tenke transparante, tanba ita hakarak ema ne’ebé di’ak duni iha Polísia.” Tenik Ministériu Interiór Francisco Guterres ba jornalista sira iha resintu Ministériu Interiór (MI) Caicoli.
Ministériu Interiór nafatin depozita konfiansa ba komisaun juri, komisaun supervizaun iha Sekretariadu nomos juri envolve Guarda Nasionál Republicana (GNR) espera iha transparante.
“Ita hotu-hotu tenke tau matan ba, imi labele hein de’it fali ami, imi mós tenke haree, se iha buat ruma koalia sai para atu nune’e ami bele halo intervensaun, la kestiona ba prosesu ne’e mais ita nia hakarak ne’e buat hotu lao ho di’ak, ita la’ós deskonfia malu, imi hakarak polísia ne’ebé mai servisu ho di’ak, nune’e nafatin husu ba ita hotu-hotu ajuda haree no hili ida ne’ebé di’ak liu labele hili ida ne’ebé mai ho malandru.” Hatutan Ministériu Interiór
Ministériu Interiór esplika liután katak, rekrutamentu PNTL modalidade 20% husi veteranos ne’e tenke tuir hotu kritériu ne’ebé iha, nune’e mós idade ba kandidatu/kadetes foun husi 18-23 ida ne’e governu mak define, governu la’ós ema ida de’it, agora rekruta 400 ne’e ba sira soldadu.
Iha sorin seluk porta-voz Komisaun Rekrutamentu Polísia Nasionál Timor-Leste (PNTL) Superintendente Antonio da Luz haktuir, Diploma Ministerial N°. 17/2025 de 25 de Juñu ne’ebé sita iha artigo 20°, 21° nomos artigo 22° koalia kona-ba kondisaun admisaun Jerál ninian. Regulamentu ba konkursu admisaun públika ba kursu formasaun ba ajente Polísia Nasionál Timor-Leste, ba rekrutamentu total kandidatu 400.
“Ami garantia prosesu rekrutamentu servisu ho professional, ami sei la favorese ba ida de’it tanba sidadaun hotu iha direitu ba prosesu ida ne’e, ami la haree ba A no B, ami halo tuir de’it tuir Leí fó mai ami, katak ami sei servisu imparsial, ami la haree ba kor ka rasa, la haree ba ema ne’ebé mai ho nia pozisaun, tanba ami hakarak servisu professional no hatudu ba publiku katak PNTL bele.” Dehan Porta-voz Komisaun Rekrutamentu Polísia Nasionál Timor-Leste (PNTL) Superintendente Antonio da Luz liuhusi konferensia imprensa ba jornalista sira iha sala konferensia Centru Formasaun Akademia (CFA-PNTL)
Komisaun Rekrutamentu la bandu no la impede prontu responde karik iha buat balun ne’ebé mosu iregularidade, modalidade ba veterano no Polísia nia oan ne’ebé fó, ne’e la signifika katak nia submete dokumentos ne’e liu ona prosesu hotu-hotu hanesan, tanba sistema eliminatoriu kuandu prova mak laliu ne’e, signifika la liu ona, nia atu Polísia nia oan fali ka atu veteranu nia oan fali, se de’it kuandu la liu ne’e la liu ona.
“Nafatin informa katak ba membru sira mak komete iregularidade iha rekrutamentu PNTL “ami sama atensaun kedas ba koordendor pontu vogal sira, para atu bele haree sira ne’ebé servisu laloos bele hasai tau fali seluk, tanba ita hakarak prosesu ne’e lao di’ak, nune’e publiku labele kestiona.” Afirma Porta-voz Komisaun Rekrutamentu Polísia Nasionál Timor-Leste (PNTL) Superintendente Antonio da Luz
Kandidatura/Kadetes foun PNTL ne’ebé foti ona formulariu rekrutamentu husi Munisipiu Aileu, Ainaro, Atauro, Baucau, Bobonaro, Covalima, Dili, Ermera, Lautem, Liquiça, Manatuto, Manufahi, Oe-Cusse, Viqueque inklui Centro Formasaun Polísia Academia Díli, iha loron 05 fulan agostu 2025 ho total mane 1.233 no feto 422, hamutuk 1.655, no iha loron 06 fulan agostu 2025 mane 690 feto 267 ho total 3.666.
Reportajen : Domingas
Foto : Domingas