Dili, 09 Janeiru 2025 (Média Democracia) – Prezidente Autoridade Munisípiu Dili hamutuk ho Sekretáriu Estadu Dezenvolvimentu Lokál halo inagurasaun ba edifísiu servisu Munisipál Agrikultura Dili ne’ebé konstroi husi kompañia lokál Gaerenez Unipesoal, Lda iha Suco Becora.
Diretora kompañia Gaerenez Unipesoal.LDA, Délia Araújo de Jesus agradese ba Autoridade Munisípiu Dili ne’ebé fó fiar ba nia kompañia hodi konstroi edifísiu ne’e, hodi finaliza tuir kontratu ne’ebé iha.
“Ami halo konstrusaun ba edifísiu ida ne’e tuir nia tempu, maske dezafiu balu ami hasoru maibé ami konsege halo hotu tuir nia tempu maske tarde oitoan, dala ida tan ha’u nia agredese-wain ba Autoridade Munisipiu Dili liuhusi fiar ida ne’e ba oin sei sai parseiru di’ak liután ba ami nia kompañia.” Dehan Diretora kompañia iha atividade inaugura edifísiu Agrikultura kinat-feira ne’e.
Montante orsamenru ne’ebé hodi konstroi edifísiu ne’e hamutuk $ 169.000.00 milliaun Dollar Amerikanu ho totál kuartu 6 inklui sala koziña.
“Sentu seis-senta nove mil dolares amerikanu (169.000.00) ne’ebé hamutuk sala 6 inklui sala enkotru, sala ba kargu Diretores, sala ba Xefe sira, staff sira inklui fatin koziña ho durasaun fulan 3 ba halo konstrusaun.” Nia dehan
Nia afirma katak difikuldade ne’ebé kompañia hasoru bainhira atu konstroi edifísiu refere mak fatin ne’e uluk komunidade sira okupa, nune’e husi parte governu ho kompañia halo aprosimasaun ho komunidade sira tuir prosesu no ikus komunidade sira husik duni fatin refere hodi harii esifísiu ne’e to remata.
Iha fatin hanesan Prezidente Autoridade Munisípiu Dili, Gregório da Cunha Saldaña agradese ba kompañia ne’ebé finaliza nia konstrusaun ba edifísiu tuir tempu ne’ebé determina ho nia valór kualidade ne’ebé di’ak.
“Ita inagura tan edifísiu boot hanesan ne’e importante hodi haree iha valór kualidade, vizualmente haree de’it edifísiu ne’e furak, obrigadu ba kompañia ne’ebé ohin hatene katak finaliza tuir kontratu, ita hein katak nia kualidade mós hanesan ne’e labele vizualmente haree nia obra, durasaun mós determina nia kualidade, brigadu ba kompañia no parabéns ba Diretór polítika munisipál agrikultura nian ho nia diresaun sira iha laran, ita hotu hein fatin ida ne’e bele servisu di’ak liu no halo mudansa ba Dili iha tempu tuir mai.” Dehan PAM Dili Gregório Saldanha
Prezidente Autoridade ne’e enkoraza nafatin kompañia lokál sira atu labele lakon ho kompañia estranjeiru sira atu servisu ho disiplina hodi rai osan.
“Kuidadu osan no rai osan, tanba ema sai riku no osan iha tanba nia hatene kuidadu osan la’os haree osan iha ona atu gasta hotu, maibé ita tenki kuidadu nafatin atu nune’e hodi hadi’a obra ho kualidade no tenki hadia nafatin ba oin ho pontualidade, tanba iha obra balu iha problema ho tempu kontratu ho estensaun tanba la preparadu atu finaliza iha tempu kontratu.” Nia dehan
Prezidente ne’e husu ba diresaun agrukiultura munisipál sira hamutuk ho nia delegasaun sira atu atu nafatin organiza Agrikultór sira maske Kapitál Dili laiha rai boot ba agrikultura sira.
“Ha’u konvida mós delegasaun agrikulrura, florestal nomos diresaun seguransa alimentár, ha’u husu atu organiza nafatin ita-nia agrikultura, mesmu Dili laiha agrikultura boot maibé pelu-menus ita hahú ho agrikultura urbana oinsá atu tenta serví no akaptasaun ba ita-nia rain ki’ik mas tenki halo buat ruma, ita tenki ho prinsípiu polítika munisípiu ida nian atu rai labele mamuk no tenki kuda buat ruma ho valór ekonómiku.” Nia tenik
Nia espera ho fatin foun refere bele inspira diretór servisu agrikultura munisipál hodi haree mós ai-horis no ai-fuan sira iha areadores Dili ne’ebé komesa kuda ai-fuan barak ona, ne’ebé importa husi indonézia nomos husi rai laran rasik hodi nune’e dezenvolve agrikultura sira no hadia kualidade ai-fuan sira hodi redúz ai-fuan importa husi rai liur.
Iha biban ne’e mós Sekretáriu Estadu Dezenvolvimentu Lokál Mateus Wilfridus Talo hatutan Kompañia ne’ebé konstroi konsege finaliza edifísiu refere hanesan pasu importante nune’e servisu agrikultór munisípiu sira besik liubá iha grupu agrikultura sira.
“Obra edifisiu agrikultór munisípiu Dili ninian ne’e ha’u hanoin pasu importante ida para oinsá ita nia autoridade munisípiu Dili hakbesik liután sira-nia servisu ba ita-nia grupu agrikultores sira liu-liu asuntu floresta, peskas, ha’u hanoin ida ne’e sai ona mahon ba sira para oinsá halo servisu hodi fasilita diálogu ho grupu peskadór, grupu agrikultores no holtikultura sira iha munusípiu Dili tuir kompeténsia ne’ebé delega ona iha dekretu lei númeru 84.” Dehan Sekretáriu Estadu Dezenvolvimentu Loká ba jornalista sira
Nia salienta katak ne’e pasu importante ida ba munisípiu Dili, tanba Edifísiu ida ne’e sai mós pasu ida oinsa atu kompleta instrumentu ida desentralizasaun podér lokál nian.
Entretantu iha serimónia ne’e hetan partisipasaun husi Sekretáriu Estadu Dezenvolvimentu Lokál, Prezidente Autoridade ho nia Estrutura, prezidente autoridade sesante Guilermina da Cunha reprezentante Autoridade Postu Dom Aleixo, Autoridade lokál Suco Becora nomos Partisipante seluk
Reportajen : Estefania
Foto : Estefania