Dili, 23 Fevereiru 2026 (Media Democracia) – Laloran moris baku ba fatuk hamosu tarutu makas, nia nafatin hamnasa ho liafuan esperansa, “Aban sei di’ak liu ohin” tanba nia pentolan ne’ebé fa’an hanesan pasu ida ba moris ne’ebé di’ak liután iha futuru.
Agustino Rando Oqui ho idade (16) husi Rejiaun Administrativu Espesial Oe-cuse Ambeno RAEOA Postu Bobometo Suku Bobo-ufe Aldeia Tumin, daudaun ne’e hakotu nia estudu hodi ajuda nia aman fa’an pentolan iha Munisípiu Dili, nune’e bele ajuda ekonomia familia.
Agustino hateten, hakotu estudu iha Ensino Basico 7° ano tanba hakarak ajuda nia aman fa’an pentolan iha Munisípiu Dili, nune’e bele hetan osan ituan hodi ajuda nesesidade familia, nomos osan balun nia rai didi’ak hodi bele kontinua fali estudu. Aleinde ne’e mós Agustino iha mehi ba futuru hakarak sai PNTL. Nune’e bele sai lutu ba nasaun Timor-Leste.
“Ha’u hakotu prosesu estudu iha Eskola Primeira (EP) Tumin iha 7° ano tanba hakarak ajuda ha’u nia aman rasik halo atividade negósiu ki’ik tuir dalan ninia hanesan fa’an pentolan, nune’e bele hetan osan ituan hodi ajuda ami nia ekonomia familia. Ha’u mós iha hanoin ida hakarak kontinua fali eskola, nune’e agora daudauk ha’u tenke esforsu-an hodi buka osan liuhusi fa’an pentolan.” Dehan Agustino Rando Oqui
Oqui hatutan, durante ne’e iha familia uma laran sempre hasoru difikuldade oioin, nune’e nia deside hodi tuir nia aman mai buka moris iha Dili. Atividades ne’ebé loron-loron nia hala’o mak dudu kerobak tuir dalan ninin hodi fa’an pentolan.
“Iha tinan kotuk 2025 ha’u mai iha Dili hela hamutuk ha’u nia aman iha Kampung Baru hodi halo negosiu hanesan fa’an pentolan. Kada loron ha’u tenke dudu gerobak tuir dalan ninin lori pentolan hamutuk 25 dolar. Nune’e iha tuku 3.00 lorokraik ha’u tenke dudu gerobak sai husi uma Kampung Baru ba to’o Merkadu Manleunan tun ba to’o Beto, depois pentolan folin seidauk hotu ha’u tenke dudu ba to’o Tasi-tolu nune’e bele folin hotu. Se la hotu mak iha tuku 7.00 kalan ha’u tenke fila ba uma ona.” Oqui haktuir
Esplika liután, Ogui nu’udar oan mane daruak husi familia uma laran hakotu nia estudu iha 7° ano iha tinan 2025 nia laran, tanba hakarak ajuda nia aman rasik hodi halo negósiu kiik hanesan fa’an pentolan iha Munisípiu Dili, nune’e bele hetan osan ituan hodi ajuda ekonomia familia.
Reportajen : Nelfiano
Foto : Nelfiano