Jogjakarta, 09 Dezembru 2025 (Média Democracia) – Primeiru-Ministru (PM), hala’o vizita ofisiál ida hodi hasoru-malu ho Liurai Jogjakarta, Sri Sultan Hamengkubuwono X iha ninia servisu fatin Rejiaun Espesiál Jogkarta (DIY, sigla Indonézia), segunda (08/12/2025). Vizita ofisila ne’e Média Democracia asesu husi pajina PM, Tersa semana ne’e.
Primeiru-Ministru hala’o vizita ofisial ba Liurai Jogjakarta ne’e bainhira partisipa ajenda negosiasaun da-ruak bá Fronteira Maritima entre Timor-Leste ho Indonézia.
“Priveleju ida ba ha’u, ida ne’e nu’udar ha’u nia prezensa da-huluk iha Jogjakarta buat ida ne’ebé halo ha’u senti hakfodak mak foin hatene istoria kona-ba Jogjakarta hafoin hasoru malu ho Sri Sultan. Antes ne’e ha’u rona de’it mak Jogjakarta buat ne’ebé halo ha’u hakarak tebes atu mai mak Borobudur ne’ebé besik Jogjakarta maibé la hatene diferensa unika entre Jogjakarta ho Provinsia sira seluk.” Dehan Primeru Ministru Kay Rala Xanana Gusmão
Primeru Ministru hatutan, sente ondradu tebes tanba hasoru-malu ho Sri Sultan hodi bele koalia bá malu no bele komprende di’ak liután atu hatene diferensa únika iha Indonézia ne’ebé ho ninia illa ki’ik-oan barak tebes.
Iha fatin hanesan Sri Sultan Hamengkubuwono X hateten, agradese bá Primeiru-Ministru tanba bele iha biban hodi hala’o vizita mai Jogjakarta.
“Ami nain rua koalia oitoan kona-ba istoria Jogjakarta nian. Loos duni katak ita presiza fó hanoin ba malu hodi hadia ita-nia Nasaun. Ha’u espera vizita ne’e ita-nia relasaun sei di’ak liután, tanba Timoroan barak mós estuda iha Jogja.” Dehan Liurai Sri Sultan Hamengkubuwono X
Akompaña Primeiru-Ministru iha vizita ne’e maka Embaixadór Timor-Leste iha Indonézia, Roberto Soares no Embaixadór Indonézia iha TL, Octo Dorinus Manik. Sri Sultan Hamengkubuwana X moris iha loron 2 fulan-Abril tinan 1946 ho naran Bendara Raden Mas Herdjuno Darpito nu’udár Sultan 10 Ngalkarya nian.
Sultanadu Hadiningrat ne’ebé ukun dezde 1989 nomos hala’o kna’ar nu’udár Governadór da-toluk bá Rejiaun Espesiál Yogyakarta dezde 3 Outubru 1998 to’o agora. Herjuno Darpito moris iha nobreza Palásiu Yogyakarta nian ho títulu Bendara Raden Mas (BRM), títulu ida ne’ebé tradisionalmente fó bá desendente besik sira husi ukun-na’in atuál ka antigu sira.
Nia maka oan-mane boot liu-husi Hamengkubuwana IX no nia kaben da-ruak, Kanjeng Raden Ayu (KRAy) Windyaningrum, ne’ebé nia kaben iha tinan 1943.
Esplika liután tuir regulamentu palásiu nian, nia pozisaun nu’udár oan-mane boot halo Herjuno sai figura ida ne’ebé maka tradisionalmente konsidera nu’udár kandidatu prinsipál bá ninia desendente.
Reportajen : Nelfiano
Foto : Média-GPM