Dili, 21 Agostu 2026 (Media Democracia)- Autoridade Seguransa, Polísia Nasionál Timor-Leste (PNTL), liuhusi Diresaun Servisu Investigasaun Kriminál (DSIK), Iha kuarta (19/08) ezekuta mandadu prizasaun ho NUC: 0248/26.PNSIC ba arguidu nain-13, hafoin Tribunal Judisiál Primeira Instánsia Dili altera medida koasaun hosi Termu Identidade no Rezidénsia (TIR) ba Prizaun Preventiva (PP).
Arguidu nain-13 ne’e alegadamente envolve iha kazu scam call centre ne’ebé hela iha área Ulmera, Munisípiu Likisá.
Ezekusaun mandadu prizasaun ne’e hala’o tuir desizaun Tribunal Judisiál Primeira Instánsia Dili (TJPID), ne’ebé determina alterasaun medida koasaun ba Prizaun Preventiva ba arguidu sira ne’ebé atualmente iha prosesu investigasaun kona-ba alegasaun envolvimentu iha atividade scam call centre.
Hafoin ezekusaun mandadu, arguidu nain-13 lori ba Prizaun Becora atu kumpri medida Prizaun Preventiva, tuir orden no desizaun autoridade judisiál kompetente.
Diresaun Servisu Inveatigasaun Kriminál, PNTL kontinua hala’o prosesu investigasaun tuir prosedimentu legál atu apura faktu no evidénsia sira relasiona ho kazu ne’e, no garante katak prosesu investigasaun hala’o ho respeitu ba lei no direitu fundamentál ba parte hotu.
PNTL reafirma kompromisu atu kontinua kombate atividade kriminál, inklui fraude no forma krime sibernétika sira, liuhusi investigasaun profisionál no kolaborasaun ho autoridade judisiál, ho objetivu atu garante seguransa no ordem públika iha Timor-Leste.
Reportajen : Estefania Cardoso
Foto : Estefania Cardoso