Dili, 30 Jullu 2025 (Média Democracia) – Prezidente Republika, José Ramos-Horta, prezide serimónia tomada de posse ba Embaixadór foun Timor-Leste nian ba Reinu Béljika no Repúblika Demokrátika Popular Laos iha Palásiu Prezidensiál Nicolau Lobato. Serimonia tomada de posse ne’e hala’o iha tersa feira semana ne’e iha salaun PR, Aitarak laran Dili.
Iha diskursu Prezidente Republika hateten, Maria de Lurdes Martins de Sousa Bessa, simu posse nu’udar Embaixadóra Estraordináriu no Plenipotensiáriu ba Reinu Béljika. Sra. Bessa sai Diplomata distintu ida, ho esperiénsia barak iha área polítika, diplomátika no edukasaun. Antes ne’e, nia okupa kargu hanesan Vise-Ministra Edukasaun no Kultura (2017–2018), Membru Parlamentu Nasionál (2012–2017), no Embaixadór ba Suisa (2021–2024).
Nia mós servisu nu’udar Asistente Polítiku ba UNTAET, Asistente Pessoál ba Eis-Prezidente Xanana Gusmão, no Asistente Polítika iha Embaixada EUA iha Timor-Leste. Ho nia kontribuisuun, Prezidente Ramos-Horta kondekora ba nia Grau Kolár Orden Timor-Leste (2024). Defensora ida ba direitu feto no juventude, nia autor ba livru “Loron Ida” no servisu ho organizasaun hanesan Fundasaun Alola hodi promove kauza sosiál sira.
Prezidente Republika hatutan, João Freitas de Câmara simu posse nu’udar Embaixadór Estraordináriu no Plenipotensiáriu ba Repúblika Demokrátika Popular Laos. Câmara antes ne’e servisu nu’udar Embaixadór ba Tailándia, Kambója, Laos no Myanmar, no Reprezentante Permanente Timor-Leste nian ba UNESCAP.
Nia kaer pozisaun xave sira iha Ministeriu Negosius Estranjeirus, inklui Diretór-Jerál ba Ázia-Pasífiku no Sekretáriu-Jerál. Iha 2024, nia nomeadu nu’udar Xefe Protokolu Estadu, hodi jere vizita ofisiál sira inklui vizita sira husi Sekretariu-Jeral ONU no Papa Francisco. Nia kontinua serbí nu’udar Sekretariu-Jeral, ho dedikasaun ba diplomasia.
Nomeasaun sira ne’e reafirma Timor-Leste nia kompromisu hodi hametin parseria global sira. Embaixadór rua ne’e lori esperiénsia no dedikasaun ne’ebé boot ba sira nia kargu foun, hodi garante promosaun ba pás, kooperasaun no dezenvolvimentu mútuu.
“Timor-Leste nia misaun diplomátika sira importante tebes atu promove parseria internasionál sira ne’ebé forte. Ha’u iha konfiansa katak Embaixadóra Bessa no Embaixadór Câmara sei servbi ho exelénsia, hodi hametin liután ita-nia relasaun sira ho Béljika no Laos, no tane aas valór sira ita-nia nasaun nian.” Afirma Prezidente Ramos-Horta.
Prezidente Republika Horta hato’o agradesimentu ba embaixadór sesante sira-nia servisu no oferese apoiu tomak ba Embaixadór foun sira bainhira sira asume sira nia funsaun.
Reportajen : Domingas
Foto : Media Officer PR