Dili, 9 Abril 2025 (Média Democracia) – Prezidente Republika José Ramos-Horta, simu Karta Kredénsia husi Sr. Madan Kumar Ghildiyal, nu’udar Embaixadór Estraordináriu no Plenipotensiáriu Repúblika Índia nian ba Repúblika Demokrátika Timor-Leste. Serimónia ofisial ne’e hala’o iha Palásiu Prezidensiál Nicolau Lobato.
Embaixadór Ghildiyal nu’udar diplomata karreira ida ne’ebé hahu iha servisu estranjeiru Índia nian iha tinan 1990. Molok nomeasaun mai Timor-Leste, embaixador hala’o servisu nu’udar Konsul (Polítiku, Komérsiu no Asuntu Komunidade) iha Konsuladu Jerál Índia nian iha Atlanta, ninia kna’ar diplomátiku anteriór sira inklui Adjuntu Sekretáriu iha Ministériu Negósiu Estranjeiru toma konta ba Administrasaun no asuntu Pensaun, Primeiru Sekretáriu iha Embaixada Índia nian iha Jakarta ne’ebé jere Setór Informasaun no Asuntu Polítiku, no Konsul iha Konsuladu Jerál Índia nian iha Jeddah jere asuntu komersiál sira.
“Ho haksolok Ha’u boas-vindas ba Embaixadór Ghildiyal nu’udar reprezentante Índia nian mai Timor-Leste. Ligasaun Dili-Delhi importante tebes ba dezenvolvimentu no integrasaun rejionál nasaun nian. Ha’u fiar katak iha Embaixadór Ghildiyal nia lideransa, lasu amizade no kooperasaun entre ita-nia nasaun sei atinji nivel foun ne’ebé fó benefísiu ba ita-nia povu sira.” Deklara Prezidente Ramos-Horta.
Nia hatutan Timor-Leste no Índia mantein relasaun bilaterál ne’ebé forte dezde estabelese relasaun diplomátika iha 24 Janeiru tinan 2003, kolabora iha setór defeza, edukasaun, saúde, agrikultura no kulturál. Relasaun sai metin liután iha 2024, marka ho partisipasaun Prezidente Ramos-Horta iha Simeira Globál Vibrante Gujarat iha fulan Janeiru, iha ne’ebé Prezidente hasoru malu ho Primeiru-Ministru Índia hodi diskute kooperasaun iha petróleu, gás, dijitalizasaun, no interkâmbiu edukasionál. Momentu diplomátiku ida-ne’e kontinua ho vizita estadu istóriku dahuluk husi Prezidente Índia nian mai Timor-Leste iha Agostu 2024, tuir ho nasaun rua estabelese misaun diplomátika permanente.
“Timor-Leste loke nia Embaixada iha New Delhi iha fulan Outobru tinan 2024 no Índia estabelese nia Embaixada iha Dili iha fulan Setembru tinan 2024, hatudu sira-nia kompromisu ba malu atu hametin liután relasaun bilaterál no apoia Timor-Leste nia envolvimentu ho ASEAN. Timor-Leste hein atu kontinua kooperasaun forte ho Repúblika Índia iha Embaixador Ghildiyal nia lideransa.” Dehan PR ba jornalista
Prezidente Republika Ramos-Horta fiar katak nomeasaun Embaixadór Madan Kumar Ghildiyal sei eleva no hametin liután lasu amizade no kooperasaun entre nasaun rua, halo ligasaun Dili-Delhi sai metin liután.
Reportajen : Domingas
Foto : Média Officer PR