Dili, 20 Agostu 2026 Media Democracia— Eis Primeiru-Ministru Rui Maria de Araújo hamutuk ho antiga Ministru Saúde no ekipa, vizita Sekretariadu Tékniku Administrasaun Eleitoral (STAE) iha Caicoli, Dili, hodi husu no hetan informasaun kona-ba kritériu no prosesu eleitoral ba kandidatura ba kargu Presidente Repúblika, iha Kuarta-feira (19/08),
Tuir Rui Maria de Araújo hatete katak, nu’udar sidadaun, nia foti inisiativa atu hetan informasaun kona-ba prosesu eleitoral ba eleisaun prezidensiál ne’ebé sei hala’o iha tinan oin.
“Hanesan sidadaun, hau foti inisiativa atu mai husu informasaun kona-ba prosesu eleitoral ba eleisaun prezidensiál tinan oin nian,” hatete Rui Maria de Araújo iha STAE Caicoli.
Nia mós hato’o agradese ba Diretor-Jerál STAE, Elviro Fernandes Moniz, hamutuk ho ekipa, ne’ebé fó esplikasaun kona-ba lei, rekezitu no prosesu kandidatura ba kargu Presidente Repúblika.
Rui Maria de Araújo hatete katak esplikasaun husi STAE sai hanesan baze importante ba nia no ekipa ne’ebé apoia nia, atu bele prepara ho di’ak tanba iha intensaun atu kandidata an ba kargu Presidente Repúblika ba períodu 2027–2032.
“Hau agradese barak ba Diretor-Jerál STAE hamutuk ho diretor sira, tanba ohin sira esplika ona prosesu eleitoral tuir lei no regulamentu sira ne’ebé iha. Ida-ne’e sai hanesan baze importante ba hau rasik no ekipa ne’ebé apoia hau, atu prepara prosesu no intensaun atu kandidata ba Presidente Repúblika,” hatete nia.
Nia subliña katak, iha momentu ne’e, nia seidauk konsidera vizita no konsultasaun ne’e hanesan kandidatura ofisiál, tanba data eleisaun prezidensiál seidauk marka.
Iha parte seluk, Diretor-Jerál STAE, Elviro Fernandes Moniz, hatete katak STAE prontu atu fó informasaun ba sidadaun hotu-hotu ne’ebé iha intensaun atu kandidata an ba kargu Presidente Repúblika, liuliu kona-ba prosesu no enkuadramentu legal.
“Dr. Rui iha intensaun atu kandidata nia an no sira hakarak mai husu informasaun kona-ba rekezitu. STAE aprezenta rekezitu no enkuadramentu legal, no ami prontu atu fasilita sidadaun Timoroan hotu ne’ebé hakarak hetan informasaun kona-ba prosesu kandidatura,” hatete Elviro Fernandes Moniz.
Reportagem : Lourenço / Nicodemos /Estagiadus
Foto : Nicodemos