Dili, 6 Maiu 2025 (Média Demokrasia) – Iha ambitu selebrasaun loron mundial lian portugés iha Timor-Leste Primeiru Ministru Kayrala Xanana Gusmão husu ba inan aman Timor-Leste hotu atu motiva sira-nia oan atu aprende lian Portugés, tanba lian Portugés ne’e sai hanesan identidade ba Timor-Leste.
Nia dehan selebrasaun loron mundial lian Portugés nian, ne’ebé selebra tinan-tinan iha loron 5 fulan maiu, estudante, profesór/a no inan-aman sira husi estudante eskola CAFE iha Dili organiza marsa ida iha Embaixada Portugal Dili nia oin ba to’o Palasiu Governu.
“Ha’u husu inan aman hotu-hotu book imi-nia oan sira atu ko’alia lian Portugés, la’ós Ingles no Indonezia, ha’u hatene katak iha tinan 24 nia laran lian Indonezia domina ona sidadaun TL sira, maibé ha’u husu atu reduz ka labele uza lian Indonesia, se lae ita kontinua sai parte husi Indonezia. Tenke fó motivasaun ba ita-nia oan sira atu aprende lian Portugés, tanba identidade Portugal no Timor-Leste nian.” Dehan Primeiru-Ministru Xanana Gusmao iha Palasiu Governu ambitu selebrasaun loron mundial lian portuges
Ministra Edukasaun Dulce de Jesus hateten katak Ministeriu Edukasaun koko atu halo estudante hotu aprende no ko’alia lian Portugés tanba sira nemak lian ofisiál.
“Ohin ita selebra loron lian portugés nu’udar kna’ar importante ida husi Ministeriu Edukasaun no asegura formasaun sedu lian portugés iha eskola liuhusi métodu hanorin nian atu nune’e sidadaun hotu-hotu husi TL bele ko’alia lian portugés ho kualidade.” Dehan Ministra Edukasaun Dulce de Jesus
Ministra relata katak dezenvolvimentu aprendizajen lian Portugés ne’e di’ak tebes, iha ne’ebé eskola hotu-hotu hala’o kursu lian Portuges husi hanorin báziku to’o sekundáriu.
“Disiplina hotu uza lian portugés. No métodu aprendizajen ne’e uza portugés hodi esplika no hakerek, iha ne’ebé profesór hotu-hotu tenke hatene ko’alia lian Portugés.” Ministra relata
Representante inan aman husi estudante sira, Imelda Barbosa Nunes dehan katak, nia sei motiva nia oan sira atu kontinua aprende lian Portugés.
“Ha’u orgullu tebes ho mensajen Primeiru Ministru nian ohin, no iha futuru, nu’udar inan-aman, ami sei kontinua fó ami-nia tempu atu motiva ami-nia oan sira atu aprende lian Portugés, ho métodu oioin bainhira ami-nia oan sira fila ba uma, ami inan aman sei fó tempu atu book ami-nia oan atu aprende lian Portugés.” Dehan Imelda Barbosa Nunes
Nia informa sei motiva oan sira atu bele aprende ho diak liu lian portugés tanba lian portugés ne’e hanesan lian ofisial iha nasaun ida ne’e atu dezenvolve diak liu ba iha futuru mak jerasaun sira tenke aprende ho diak lian refere.
Reportajen : Domingas
Foto : Pajina Ofisial PM