Dili, 07 Janeiru 2026 (Média Democracia) – Komandu Polisia Nasional Timor-Leste (PNTL) realiza komunikadu imprensa hodi partilla mós informasaun kona-ba sidadaun Indonesia ida ne’ebé falsifika dokumentu hodi simu diretu pensaun veteranu iha rai doben Timor-Leste.
Porta-voz Komandu PNTL Superintendente Polisia João Belo dos Reis hateten, liuhusi konferensia ne’e atu fó sai mós kona-ba sidadaun estranjeiru husi Indonesia ne’ebé falsifika dokumentu.
“Ami hetan dadus no informasaun ne’e kleur tia ona ne’ebé deskonfia sidadaun estranjeiru falsifika dokumentu, potensia mosu iha parte Ministeriu relevante ne’ebé ami akompaña no infiltra ami-nia servisu informal sira hodi rekolla no ema se maka fasilita sidadaun estranjeiru ne’e nia dokumentu.” Dehan Porta-voz Komandu PNTL Superintendente Polisia João Belo dos Reis
Porta-voz Komandu PNTL hatutan, ikus mai PNTL detekta katak mensionadu iha publikasaun ne’ebé liu tia ona envolve forte iha faktus katak ema balun husi Timor-Leste fasilita inan feton ne’e hodi hetan veteranus, mesmuke lei ne’e rasik bandu sidadaun estranjeiru atu simu pensaun veteranus ne’ebé Governu fó sai ona.
“Prosesu indentifikasaun sei determina sidadaun ertranjeiru ne’e iha Kartaun Eleitoral, Bileti Identidade, Sertidaun RDTL no Sertidaun Batismu. Aleinde ne’e sidadaun refere nia dokumentus asegura hela, nune’e aturiza nia hela ho familia sira iha Dili laran maibé prosesu judisial lao nafatin tuir lei no aprezenta ona ba AMP.” Hatutan Porta-voz Komandu PNTL
Porta-voz afirma, ema ne’ebé fasilita sidadaun estranjeiru ne’e nia dokumentu refere parte relevante bolu ona balun no balun seluk sei delegasaun kompetensia tuir mai no sei bolu tan hodi halo prosesu investigasaun tuir lei.
Esplika liután falsifikasaun dokumentu la valoriza mós luta na’in sira, nune’e kazu ida-ne’e kosidera grave tebes no tenke hetan atensaun sedu husi estadu liu-liu parte sira ne’ebé produs dokumentus sidadaun estranjeiru ne’e nian. Nune’e PNTL sei halo liña koordenasaun ho parte notariadu nomos Ministeriu Asuntu Kombatentes no Libertasaun Nasional hodi bele produs informasaun ne’ebé konkretu.
Reportajen : Nelfiano
Foto : Nelfiano