Dili, 02 Setembru 2026 (Media Democracia) – Eis-Primeiru-Ministru Taur Matan Ruak konsidera kontribuisaun no luta Bispu nain-tolu ne’ebé restu mortais sira fila fali mai Timor-Leste hanesan parte importante ida husi istória Igreja Katólika no luta libertasaun nasionál iha Timor-Leste.
Taur Matan Ruak hatete katak serimónia misa ne’ebé realiza iha Tasi-Tolu, Dili, la’ós de’it atu hanoin no konta istória, maibé mós atu fó onra ba Bispu nain-tolu ne’ebé iha ona kontribuisaun boot ba Igreja no povu Timor-Leste.
“Primeiru lugar, ha’u kontenti tebes tanba bele partisipa iha serimónia importante ida ne’e, ne’ebé lori fila fali mai ita nia rai restu mortais Amo Bispu nain-tolu ne’ebé importante tebes ba ita nia istória Igreja iha Timor, liu-liu Dom Jaime Garcia Goulart, Dom José Joaquim Ribeiro no Monsenhor Martinho da Costa Lopes. Sira-nia kontribuisaun no luta importante tebes ba ita nia rai,” dehan Taur Matan Ruak ba jornalista sira, hafoin partisipa iha misa iha Tasi-Tolu, iha Tersa-feira (01/09).
Taur mós hatete katak povu Timor-Leste la bele haluha kontribuisaun Dom Ricardo, ne’ebé nia restu mortais mós iha Timor-Leste, no konsidera serimónia ne’e hanesan momentu importante atu fó onra ba lider Igreja sira ne’ebé sira-nia moris no servisu dedika ba Igreja no nasaun.
“Entaun, iha forma ida atu fó onra ba sira no rekonhese sira-nia kontribuisaun ba Igreja no ba nasaun,” hatete nia.
Taur Matan Ruak mós destaca relasaun entre Monsenhor Martinho da Costa Lopes ho Komandante Xefe, agora Primeiru-Ministru Kay Rala Xanana Gusmão, ne’ebé konsidera katak Monsenhor Martinho iha kontribuisaun importante liu-liu iha luta atu divulga informasaun kona-ba situasaun no akontesimentu sira ne’ebé akontese iha Timor-Leste durante okupasaun.
“Dom Martinho iha kontaktu di’ak ho Komandante Xefe, atuál Primeiru-Ministru Xanana Gusmão, no nia fó nia kontribuisaun maka’as ba ita nia rai no ita nia luta, liu-liu hodi divulga informasaun sira ne’ebé iha relasaun ho akontesimentu sira ne’ebé akontese iha ita nia rai laran,” dehan Taur.
Nia hatete tan katak kontribuisaun Monsenhor Martinho da Costa Lopes halo nia sai ema importante iha luta povu Timor-Leste, maski nia rasik hasoru situasaun difísil, inklui sai husi Timor-Leste no kontinua nia luta iha Portugál to’o nia mate.
“Tanba ida ne’e mak hasai nia husi Timor, nia pasa momentu difísil iha Portugál to’o nia mate. Entaun, Timor-Leste tenke agradese ba sira hotu-hotu tanba sira-nia kontribuisaun ba ita nia rai,” nia hakotu.
Reportajen : Estefania Cardoso
Foto : Estefania Cardoso